Barcelona vihet në lëvizje: Hansi Flick kërkon yllin e Real Betisit për të forcuar prapavijën

Barcelona ka nisur hapat konkretë për të konsoliduar repartin e mbrojtjes, duke e drejtuar vëmendjen nga kampionati spanjoll. Në krye të listës së dëshirave të klubit katalunas është pozicionuar mbrojtësi brazilian i Real Betisit, Natan. Strategu gjerman, Hansi Flick, është i vendosur për të afruar një përforcim gjatë merkatos së janarit. Nevoja për ndërhyrje në mbrojtje është bërë emergjente, duke pasur parasysh serinë e gjatë të dëmtimeve që kanë goditur skuadrën këtë sezon. Sipas raportimeve të ekspertit të transferimeve, Matteo Moretto, drejtuesit e Barcelonës po e monitorojnë me kujdes 25-vjeçarin. Performanca e tij mbresëlënëse ka zgjuar gjithashtu interesimin e disa skuadrave elitare në Premierligë, duke e bërë garën për shërbimet e tij mjaft të ashpër. Natan arriti të spikasë që në sezonin e tij të parë në futbollin spanjoll, çka e shtyu Real Betisin të ushtronte opsionin e blerjes përfundimtare nga Napoli, për një shifër prej nëntë milionë eurosh. Megjithatë, një transferim i mundshëm në Camp Nou gjatë dimrit duket një operacion kompleks, pasi klubi nga Sevilla nuk është i gatshëm të privohet nga lojtari pa një ofertë financiare tejet të favorshme. Me një kontratë që e lidh me Betisin deri në vitin 2030, vlera e tregut për brazilianin tashmë ka kapur shifrën e 30 milionë eurove. Përballë këtyre rrethanave, nuk përjashtohet mundësia që Barcelona të shtyjë tentativën për transferimin e tij deri në sesionin veror të merkatos.