Magjia rikthehet: Ronaldinho bëhet gati për zbritjen në fushë pas një dekade

Numërimi mbrapsht ka nisur për një prej rikthimeve më të bujshme në historinë e futbollit. Legjenda braziliane, Ronaldinho, është gati të shkelë sërish në fushën e blertë më 15 nëntor, ku do të përfaqësojë fanellën e Ravennas në derbin e zjarrtë kundër Forlìt, në kuadër të Serie C. Spektakli do të zhvillohet në stadiumin “Bruno Benelli”, me fillim nga ora 17:30. Ky rikthim i 46-vjeçarit në futbollin italian ka ngjallur emocione të mëdha, duke u kthyer në një ngjarje që tejkalon kufijtë e një ndeshjeje të zakonshme. Interesimi i jashtëzakonshëm i tifozëve ka detyruar klubin të ndërmarrë masa urgjente për zgjerimin e kapaciteteve të stadiumit. Me instalimin e një tribune të re, pritet të shtohen 1.800 vende të tjera, me synimin final për të thyer rekordin historik prej 4.973 spektatorësh, të vendosur më parë në përballjen ndaj Spezias. Ndërkohë, pritshmëritë brenda klubit janë të larta. Trajneri Andrea Mandorlini e pret me padurim aktivizimin e brazilianit, ndërsa zëvendëspresidenti Ariedo Braida është i bindur se Ronaldinho ende ka shumë për të dhënë. “Ai mbetet kampion. Kush lind kampion, vdes i tillë. Ndonëse vitet kanë kaluar, ai mbetet një madhështor. Është vetë gëzimi dhe magjia e futbollit; jam i sigurt se do të na dhurojë momente të paharrueshme”, theksoi Braida. Aktualisht, Ronaldinho është duke finalizuar përgatitjet e tij në Brazil, ku është parë së fundmi duke ushtruar footvolley në rërën e plazhit. Ky rikthim vjen pas më shumë se dhjetë vitesh nga paraqitja e tij e fundit zyrtare, pasi ish-ylli i Barcelonës kishte zyrtarizuar tërheqjen nga futbolli në vitin 2018.