Dosja 'Plumbi i Artë': SPAK kërkon 300 vite burg për 15 të pandehurit e krimit të organizuar

Prokuroria e Posaçme kundër Korrupsionit dhe Krimit të Organizuar (SPAK) ka shpalosur të enjten pretencën përfundimtare për një prej dosjeve më komplekse dhe të rënda të viteve të fundit, të njohur si “Plumbi i Artë”. Prokurorja Doloreza Musabelliu ka kërkuar dënime që variojnë nga 9 deri në 35 vite heqje lirie për 15 të akuzuarit, të cilët përballen me akuza të rënda për vrasje me pagesë, atentate dhe trafik të paligjshëm të lëndëve narkotike. Në total, kërkesa e prokurorisë për këta të pandehur shkon në rreth 300 vite burg. Sipas kërkesës së SPAK, masat më të ashpra me nga 35 vite burg janë kërkuar për Henrik Hoxhajn dhe Petrit Qolin. Në të kundërt, për Nuredin Dumanin, i cili konsiderohet si figura kyçe e dosjes dhe bashkëpunëtor i drejtësisë, prokuroria ka propozuar një dënim prej 10 vitesh. Dënime të reduktuara janë kërkuar edhe për dy bashkëpunëtorët e tjerë të drejtësisë, Erjon Alibej dhe Skerdi Tase, përkatësisht me 15 dhe 13 vite burg. Lista e plotë e dënimeve të kërkuara nga SPAK përfshin: Nuredin Dumani (10 vite), Erjon Alibej (15 vite), Skerdi Tase (13 vite), Henrik Hoxhaj (35 vite), Enver Diva (25 vite), Besian Xhixha (25 vite), Asllan Plaku (20 vite), Ardian Ozuni (15 vite), Gentian Sharra (9 vite), Agron Qoli (20 vite), Petrit Qoli (35 vite), Fatos Gosa (20 vite), Xhulian Hoxha (20 vite), Albert Pashaj (15 vite) dhe Altin Ndoci (25 vite). Operacioni i koduar “Plumbi i Artë” zuri fill në mars të vitit 2022, pas arrestimit të Dumanit dhe Hoxhajt. Dëshmitë e dhëna nga Dumani pas pranimit të bashkëpunimit me organet ligjzbatuese kanë zbardhur një seri krimesh të kryera mes viteve 2011 dhe 2022, kryesisht në qarqet e Elbasanit, Durrësit dhe Tiranës. Hetimet kanë nxjerrë në dritë vrasje të bujshme, si ajo e Emiljano Ramazanit, ekzekutimi i vëllezërve Viktor dhe Besmir Haxhia, si dhe vrasjet e Fatmira Dedjes dhe Bujar Çelës. Përveç këtyre, janë dokumentuar plane për eliminime fizike kundrejt shpërblimeve monetare të majme, të mbështetura edhe nga komunikimet e siguruara përmes platformës Sky ECC. Ndërkohë, Henrik Hoxhaj, të cilit i është hequr statusi i bashkëpunëtorit të drejtësisë gjatë procesit, ka treguar detaje mbi atentatet, përfshirë atë të janarit 2022 ndaj biznesmenit Lulzim Masha. Sipas tij, Dumani kishte vënë në dispozicion një shumë prej 250 mijë eurosh për eliminimin e Mashës dhe të birit. Në kuadër të këtij procesi, kujtojmë se ish-shefi i sektorit të vrasjeve në Policinë e Elbasanit, Leonard Palushi, është dënuar më herët me 28 muaj burg. Tashmë, procesi gjyqësor në Gjykatën e Posaçme kalon në fazën e parashtrimeve nga ana e mbrojtjes, përpara se të shpallet vendimi përfundimtar.