Superiore, zbulohet kalendari i javës së 11-të: Egnatia kërkon shkëputjen, Teuta e Partizani në provë të vështirë

Kampionati elitar i futbollit shqiptar, “Abissnet Superiore”, do të ngrejë siparin këtë fundjavë me sfidat e javës së 11-të. Më 7 dhe 8 nëntor do të luhen pesë takime mjaft interesante, të cilat pritet të sjellin emocione të forta dhe luftë sportive në çdo cep të fushës. Ndeshjet e para do të zhvillohen të shtunën duke filluar nga ora 13:30, ku Laçi do të presë në shtëpi skuadrën e Partizanit, ndërsa Tirana do të masë forcat me Teutën në stadiumin “Selman Stërmasi”. Më pas, në orën 18:30, vëmendja do të zhvendoset në stadiumin “Loro Boriçi”, aty ku Vllaznia do të presë AF Elbasanin. Java do të ulë siparin të dielën me dy përballjet e mbetura. Dinamo City do të ketë përballë Skënderbeun në orën 16:00, ndërsa kryesuesja e renditjes, Egnatia, do të presë Vorën në “Egnatia Arena”, duke nisur nga ora 18:30. Pas 10 javëve të para, Egnatia udhëheq e qetë klasifikimin me 24 pikë, e ndjekur nga Teuta që numëron 20 pikë dhe Dinamo City me 17 pikë. Ndeshjet e kësaj jave janë vendimtare për ecurinë e mëtejshme të kampionatit, si për skuadrat që synojnë kreun, ashtu edhe për ato që kërkojnë të përmirësojnë pozitat e tyre në tabelë.