Diplomacia dhe punësimet familjare, Glauk Konjufca sqaron procedurën e emërimeve

Ministri i Punëve të Jashtme dhe Zëvendëskryeministri i parë, Glauk Konjufca, ka adresuar shqetësimet e ngritura lidhur me emërimet e personave me lidhje familjare me zyrtarë të lartë brenda shërbimit diplomatik. Në një deklaratë për këtë çështje, ai ka sqaruar rolin e tij në procesin e vendimmarrjes. Konjufca ka bërë të ditur se nuk është i përfshirë në përzgjedhjen e emrave konkretë për pozitat e caktuara. Sipas tij, procesi i lëvizjeve në dikasterin që ai drejton bazohet në vlerësimet e një komisioni profesional, i cili përbëhet nga diplomatë karriere. “Nuk merrem me emra të veçantë. Kemi realizuar gjithsej 54 lëvizje brenda Ministrisë së Punëve të Jashtme, ndërsa procesi është menaxhuar nga një komision profesional i caktuar nga ne, ku përfshihen edhe ambasadorë. Puna ime kufizohet te nënshkrimi i vendimeve që më serviren nga ky komision”, ka deklaruar Konjufca.