Zvicra shpall kapitullin e ri të partneritetit me Kosovën: Fokus te ekonomia dhe stabiliteti rajonal

Forcimi i lidhjeve bilaterale, nxitja e bashkëpunimit ekonomik dhe avancimi i rrugëtimit integrues të Kosovës ishin në qendër të diskutimeve gjatë takimit të sotëm ndërmjet zëvendëskryeministrit të Parë dhe ministrit të Punëve të Jashtme të Kosovës, Glauk Konjufca, dhe kryediplomatit zviceran, Ignazio Cassis. Pas takimit, ministri Konjufca vlerësoi lart partneritetin mes dy shteteve, duke nënvizuar se marrëdhëniet tona nuk limitohen vetëm në kornizat diplomatike, por gjejnë mbështetje të fuqishme te lidhjet e ngushta mes dy popujve. Ai shprehu mirënjohjen për mbështetjen e vazhdueshme të Zvicrës, duke shprehur pritshmërinë që ky shtet mik të jetë krah Kosovës edhe në hapat e ardhshëm drejt anëtarësimit të plotë në Këshillin e Evropës. “Marrëdhëniet tona janë të natyrës komunitare, të ndërtuara mbi historinë e përbashkët dhe besimin e ndërsjellë. Falënderoj ministrin Cassis dhe popullin zviceran për miqësinë e sinqertë dhe partneritetin strategjik që i ka shërbyer zhvillimit të Kosovës”, deklaroi Konjufca. Nga ana tjetër, ministri i Jashtëm i Zvicrës, Ignazio Cassis, vuri në pah progresin e dukshëm të Kosovës, duke paralajmëruar një fazë të re bashkëpunimi që pritet të nisë nga viti 2029. Sipas tij, fokusi do të zhvendoset te zhvillimi i qëndrueshëm ekonomik, investimet dhe shkëmbimet tregtare, ndërsa veçoi rëndësinë e marrëveshjes me EFTA-n, e cila tashmë është në fuqi dhe krijon mundësi të reja, sidomos në sektorin e shërbimeve. Cassis theksoi se stabiliteti i Kosovës është i pandashëm nga ai i rajonit dhe më gjerë. Ai kujtoi angazhimin historik të Zvicrës për paqen, duke përmendur investimet prej tre miliardë eurosh në rajon dhe kontributin e vazhdueshëm në kuadër të misionit të KFOR-it që nga viti 1999, duke e cilësuar këtë si angazhimin më të madh ushtarak të vendit të tij jashtë kufijve. Lidhur me dialogun Kosovë-Serbi, kryediplomati zviceran rikonfirmoi përkushtimin e shtetit të tij për normalizimin e marrëdhënieve, duke shprehur shpresën për një marrëveshje përfundimtare. Gjithashtu, ai vuri theksin te rëndësia e integrimit të plotë të komuniteteve etnike, përfshirë atë serb, si dhe sigurimin e përfaqësimit të tyre të drejtë përmes mekanizmave institucionalë.