Brukseli vlerëson progresin e MPB-së në sundimin e ligjit dhe sigurinë kombëtare

Raporti i Komisionit Evropian për vitin 2026, i bërë publik më 4 nëntor, ka nxjerrë në pah përparimin e ndjeshëm të shënuar nga Ministria e Punëve të Brendshme (MPB) dhe agjencitë në varësi të saj. Dokumenti vlerëson angazhimin e institucioneve të sigurisë në përmbushjen e standardeve evropiane. Ndër pikat kyçe të evidentuara në këtë raport është thellimi i bashkëpunimit ndërkombëtar policor, veçanërisht përmes mekanizmave si Europol, rrjeti SIENA dhe platforma EMPACT. Po ashtu, janë vlerësuar rezultatet konkrete në luftën kundër krimit të organizuar, avancimi i policimit të bazuar në inteligjencë, si dhe efikasiteti në parandalimin e terrorizmit dhe ekstremizmit të dhunshëm. Në reagimin e saj, MPB-ja ka bërë të ditur se do të intensifikojë punën për zbatimin e rekomandimeve të dala nga raporti. Kjo do të realizohet përmes miratimit të një sërë dokumentesh strategjike, si Strategjia e Migracionit 2026–2030, Plani i Kontigjencës për menaxhimin e flukseve të migrantëve dhe refugjatëve (2026–2028), Strategjia për Menaxhimin e Integruar të Kufirit dhe ajo kundër krimit të organizuar. Gjithashtu, është planifikuar krijimi i Qendrës Kombëtare për Luftimin e Terrorizmit dhe Parandalimin e Ekstremizmit të Dhunshëm. Raporti vë në dukje edhe rënien e ndjeshme të kërkesave për azil nga shtetasit kosovarë në vendet e BE-së, si dhe rritjen e nivelit të profesionalizmit brenda Policisë së Kosovës, duke u fokusuar veçanërisht te përgatitja e gjeneratave të reja të kadetëve dhe modernizimi i sistemeve të trajnimit. Ministria e Punëve të Brendshme nënvizon se mbetet e palëkundur në objektivin për forcimin e sundimit të ligjit dhe bashkëpunimin e ngushtë me partnerët ndërkombëtarë, me synimin final për përafrimin e plotë me praktikat evropiane. Kujtojmë se Raporti për Kosovën 2026 është pjesë e Paketës së Zgjerimit të Bashkimit Evropian dhe përfshin periudhën nga shtatori i vitit 2025 deri në atë të 2026-ës. Ky vlerësim vjen në një moment domethënës, dhjetë vite pas hyrjes në fuqi të Marrëveshjes së Stabilizim-Asociimit dhe katër vite pas aplikimit të Kosovës për anëtarësim në Bashkimin Evropian.