Kusari-Lila ultimatum tregtarëve: Ulni çmimin e naftës, përndryshe rikthehet çmimi tavan

Ministrja e Industrisë, Ndërmarrësisë, Tregtisë dhe Inovacionit, Mimoza Kusari-Lila, ka dërguar një mesazh të qartë për tregtarët e derivateve në vend. Ajo ka paralajmëruar se nëse rënia e çmimit të naftës në bursat ndërkombëtare nuk reflektohet në pikat e shitjes në Kosovë brenda 24 orëve, qeveria do të detyrohet të ndërhyjë duke rikthyer çmimin tavan. Sipas ministres, gjatë dy ditëve të fundit është vërejtur një tendencë rënëse e çmimeve në tregjet globale. Ajo ka theksuar se dikasteri që ajo drejton është i përgatitur të përdorë bazën ligjore për të vendosur sërish çmimin maksimal, nëse tregu vendor nuk përshtatet me lëvizjet pozitive ndërkombëtare. “Nëse që nga nesër nuk shohim një reflektim të rënies së çmimeve në tregun tonë, ne do ta rikthejmë çmimin tavan, pasi e kemi bazën e nevojshme ligjore për një veprim të tillë”, deklaroi Kusari-Lila. Kjo deklaratë e ministres erdhi gjatë zhvillimit të seancës së Kuvendit të Kosovës, si përgjigje ndaj interesimit të deputetes së Aleancës për Ardhmërinë e Kosovës, Albana Bytyqi, e cila kërkoi sqarime mbi situatën e çmimeve të karburanteve në vend.