Talenti i Vaduzit, Lutfi Dalipi i thotë 'jo' Zvicrës, rruga e hapur për Shqipërinë ose Kosovën

Mesfushori me perspektivë 20-vjeçar i Vaduzit, Lutfi Dalipi, ka marrë një vendim madhor për karrierën e tij ndërkombëtare, duke hequr dorë përfundimisht nga mundësia për të përfaqësuar Kombëtaren e Zvicrës. Përveç opsionit helvetik, lojtari ka të drejtë të luajë edhe për Portugalinë, Shqipërinë apo Kosovën, ndërkohë që dy shtëpitë e futbollit shqiptar po bëjnë përpjekje intensive për ta bindur që të veshë fanellën kuqezi ose atë dardane. I rritur në rajonin e Gruyère dhe duke shkëlqyer në Superligën zvicerane, Dalipi ka zgjuar interesimin e skuadrave të njohura evropiane, ku bëjnë pjesë Stuttgarti, Hoffenheimi, Eintracht Frankfurti dhe Salzburgu. Disa nga këto klube thuhet se janë të gatshme të investojnë shuma miliona eurosh për shërbimet e tij. Edhe pse trajneri i Zvicrës, Murat Yakin, e ka vlerësuar lart potencialin e tij, ai ka pranuar se konkurrenca në mesfushë është e jashtëzakonshme. Nga ana e tij, Dalipi ka refuzuar ftesën e grupmoshave U21 të Zvicrës, duke shmangur marrjen e vendit të ndonjë lojtari tjetër, pasi ka vendosur të mos vijojë rrugëtimin me këtë përfaqësuese. Sipas mediave zvicerane, mesfushori i ka dhënë fjalën gjyshit të tij se në arenën ndërkombëtare do të luajë për Shqipërinë ose Kosovën. Vendimi përfundimtar pritet të zyrtarizohet gjatë javëve në vijim. Me këtë vendim, Federata Zvicerane e Futbollit rrezikon të humbasë edhe një tjetër talent të formuar në vend, pas rasteve të ngjashme me Leon Avdullahun, Albian Hajdarin dhe Alessandro Romanon. Aktualisht, Dalipi është nën kontratë me Young Boys deri në qershor të vitit 2030, ndërsa klubi e konsideron atë si pasuesin ideal të Alvyn Sanches. Forma e tij fizike dhe sportive këtë edicion te Vaduzi është në nivele të larta, me pesë gola të shënuar dhe nëntë asistime në 12 paraqitje në elitën e futbollit zviceran. Mbetet për t'u parë nëse ai do të jetë prurja e re e trajnerit Franco Foda për sfidat e nëntorit, ku Kosova do të përballet me Izraelin dhe Irlandën, ndërsa lista e përzgjedhësit dardan pritet të publikohet shumë shpejt. Në anën tjetër, si kreu i Federatës së Futbollit të Kosovës, Agim Ademi, ashtu edhe menaxheri Bajram kanë paralajmëruar afrime të reja në radhët e Përfaqësueses së Kosovës.