Veprim historik në hendboll: Çairi luan të dyja sfidat evropiane në Azerbajxhan

Skuadra shqiptare e Çairit ka zyrtarizuar vendimin për të zhvilluar të dyja takimet e rrethit të tretë në Kupën Evropiane të EHF-së në hendboll kundër formacionit azerbajxhanas, Kur. Klubet kanë gjetur gjuhën e përbashkët që të dyja ndeshjet e këtij raundi të caktohen në qytetin Mingachevir të Azerbajxhanit, respektivisht në sallën sportive ku ekipi vendas i Kur luan ndeshjet e tij si nikoqir. Dueli i parë do të inicohet më 13 nëntor, duke filluar nga ora 14:00, në ambientet e Qendrës Olimpike të Mingachevirit. Ndërkohë, ndeshja e kthimit është caktuar të mbahet më 15 nëntor, në të njëjtën kohë dhe në të njëjtën qendër sportive. Kujtojmë se vashat e Çairit nuk kanë pasur nevojë të paraqiten në raundin e dytë pasi kanë qenë të lira, ndërsa tani para tyre hapet një shans i artë për të prekur fazën e 16 ekipeve më të mira të këtij kompeticioni prestigjioz. Për skuadrën shqiptare me seli në Shkup, përballja me ekipin Kur shënon një moment kyç dhe një mundësi reale për të vazhduar aventurën e tyre në arenën ndërkombëtare.