Valë reagimesh për skandalin e bullizmit: Flet bashkëshortja e Ardian Bujupit

Vala e reagimeve në lidhje me skandalin e grupeve të mbyllura në rrjetin social Facebook, ku pretendohet se disa vajza janë fyer dhe bullizuar rëndë në të kaluarën, vijon të mbajë vëmendjen e publikut. Kjo çrbërje e ngjarjeve të vjetra ka sjellë debate të gjera në platformat online. Në mesin e zërave të shumtë është përfshirë edhe Fjolla Fetinci, partnerja e këngëtarit të njohur shqiptar, Ardian Bujupi. Përmes një video-mesazhi të ndarë në llogarinë e saj në TikTok, ajo ka shfaqur hapur pakënaqësinë dhe revoltën e saj ndaj episodeve të ndodhura vite më parë, duke dënuar përpjekjet për t'i minimizuar këto veprime. “Si mund të mbrojë dikush një person që për javë dhe muaj me radhë ka fyer dhe bullizuar dikë në mënyrën më të keqe në internet, duke e arsyetuar me ‘ajo ishte e re dhe të gjithë bëjnë gabime kur janë të rinj’?”, ka ngritur pyetjen Fjolla në hyrje të materialit të saj vizual. Më tej, ajo është ndalur te dëmet emocionale dhe psikologjike që, sipas saj, këto akte bullizmi kanë shkaktuar te viktimat. Ajo kujtoi se gjatë asaj kohe familjarët e vajzave kanë qenë shënjestër e mesazheve fyese, ndërkohë që janë publikuar imazhe dhe narrativa plotësisht të trilluara. “Si mund të kesh guximin të dalësh para mijëra njerëzve, të ulesh para kamerës dhe të thuash gjëra të tilla, duke mos menduar se jetë njerëzish janë shkatërruar pjesërisht? U janë dërguar mesazhe baballarëve, familjarëve të grave të pafajshme, dhe janë shpërndarë fotografi e histori nga më të pavërtetat”, u shpreh ajo me ton kritik. Në mbyllje të mesazhit, Fjolla është shfaqur e ngarkuar emocionalisht, duke sjellë ndërmend ato kohë të errëta dhe duke shprehur habi se si ende sot ka individë që tentojnë të justifikojnë sjellje të tilla të papranueshme. “O Zot, njerëz, vetëm kur flas për këtë, vetëm kur mendoj se çfarë kohe ka qenë ajo atëherë… Dhe që ka ende njerëz që e mbrojnë këtë sjellje, është vërtet e çmendur”, përfundoi ajo.