Aksident fatal në Dibër: Elektricisti humb jetën pasi shtylla elektrike bie mbi të

Një ngjarje e rëndë ka tronditur fshatin Vasie të Dibrës, ku një 60-vjeçar ka ndërruar jetë si pasojë e një aksidenti tragjik në vendin e punës. Ngjarja ka ndodhur paraditen e kësaj të marte, më 5 nëntor, rreth orës 11:45. Viktima, i cili ushtronte profesionin e elektricistit, ishte duke punuar për instalimin e një shtylle elektrike kur, në rrethana ende të paqarta, struktura është rrëzuar duke e zënë poshtë 60-vjeçarin. Menjëherë pas incidentit, viktima është dërguar me urgjencë në spital për të marrë ndihmën e nevojshme mjekësore. Megjithatë, përkundër përpjekjeve të mjekëve, plagët e marra rezultuan fatale, duke shkaktuar vdekjen e tij. Grupi hetimor dhe shërbimet e policisë kanë mbërritur në vendin e ngjarjes. Aktualisht po vijojnë veprimet hetimore për të zbardhur në detaje shkaqet që çuan në këtë aksident vdekjeprurës.