Besnikëri afatgjatë: Raphinha zgjat bashkëpunimin me Barcelonën deri në vitin 2030

Klubi i Barcelonës ka zyrtarizuar vazhdimin e bashkëpunimit me yllin brazilian, Raphinha, i cili do të mbetet pjesë e skuadrës katalanase deri në qershor të vitit 2030. Sulmuesi anësor u bë pjesë e projektit të Barcelonës në korrik të vitit 2022, pas transferimit nga radhët e Leeds United. Fillimisht, marrëveshja e tij ishte parashikuar të zgjaste deri në verën e vitit 2027, ndërsa në maj të vitit 2025, palët kishin rënë dakord për një zgjatje të parë deri në vitin 2028. Që nga momenti i transferimit të tij në “Camp Nou”, Raphinha ka dëshmuar vlerat e tij duke regjistruar 190 paraqitje zyrtare. Gjatë kësaj periudhe, ai ka arritur të tundë rrjetën e kundërshtarëve 94 herë, ndërsa ka asistuar në 62 gola të tjerë, duke u shndërruar në një figurë kyçe për formacionin e ekipit.