SHBA falënderon Specialen e Blerim Isufajt, të cilin Albin Kurti e konsideronte të padenjë për Kryeprokuror

Publikuar më: Shtetet e Bashkuara të Amerikës, përmes Ambasadës së tyre në Prishtinë kanë falënderuar edhe njëherë Prokurorinë Speciale të Kosovës, të udhëhequr nga Kryeprokurori i saj, Blerim Isufaj. Vlerësimi i amerikanëve ka të bëjë me rastin e Ardit Kutleshit, një shtetas i Kosovës i cili u u deklarua fajtor për krijimin dhe operimin e Rydox, një treg online që ofronte për shitje mjete për krimin kibernetik dhe të dhëna sensitive, përfshirë identitetet dhe të dhënat e hyrjes së vjedhura të mijëra personave. Deri te arrestimi i tij, një kontribut të madh dha pikërisht Prokuroria Speciale e Kosovës. “Një tjetër shembull i bashkëpunimit të suksesshëm SHBA-Kosovë në luftën kundër krimit kibernetik transnacional. Faleminderit Zyrës së Prokurorit të Specializuar të Kosovës dhe institucioneve të Kosovës, si dhe të gjithë të përfshirëve, për bashkëpunimin e tyre të shkëlqyer në sjelljen e këtij rasti para drejtësisë”, thuhet në njoftimin e Ambasadës së Amerikës. Edhe Departamenti Amerikan i Shtetit në njoftimin e tij tha se për këtë rast është bashkëpunuar ngushtë mes FBI-së dhe Prokurorisë Speciale. “Zyra e FBI-së në Pittsburgh e hetoi këtë rast në koordinim me Zyrën e Prokurorit Special të Prokurorisë së Shtetit të Kosovës, Drejtorinë për Hetimin e Krimit Kibernetik të Policisë së Kosovës, Strukturën e Posaçme Kundër Korrupsionit dhe Krimit të Organizuar të Shqipërisë (SPAK), Departamentin për Hetimin e Krimeve Komerciale të Policisë Mbretërore të Malajzisë dhe Dhomat e Prokurorit të Përgjithshëm të Malajzisë”, thuhej në komunikatën e DASH-it. Pushteti i Vetëvendosjes në Kosovë ka sulmuar vazhdimisht Kryeprokurorin e Prokurorisë Speciale, Blerim Isufajn, duke mos e dekretuar emrin e tij për Kryeprokuror të Shtetit. Madje, Kryeministri i Kosovës, Albin Kurti, e thoshte haptas se emri i Isufajt “s’bën”. “Unë po them që ky nuk bën [Blerim Isufaj]. Unë nuk po them ky duhet. 200 prokurorë i ka Kosova, asnjëherë nuk kam thënë se filani ose fistekja duhet të bëhen. Veç unë po them që ky nuk bën. Ky që e ka lëshu Radojicicin nuk bën. Ky ia ka heq urdhërarrestin Radojçiçit. Nuk bën ky me u bë Kryeprokuror”, tha Kurti në një intervistë në emisionin Politiko në Kanal 10.