Liza Gashi: Kosova ka mbajtur kursin e reformave drejt BE-së, përkundër ngërçit politik

Zëvendëskryetarja e Komisionit për Integrime Evropiane, Liza Gashi, ka vlerësuar se shteti i Kosovës ka arritur të shënojë përparim në segmente të caktuara të reformave, përkundër sfidave të mëdha që ka shkaktuar bllokada institucionale. Ajo ka nënvizuar se Raporti i Komisionit Evropian për vitin 2026, përkatësisht për periudhën 1 shtator 2025 – 1 shtator 2026, nuk ka konstatuar ndonjë regres, por vetëm një ngadalësim të dinamikës së zbatimit të reformave. Duke folur në emisionin 'RTK Prime', Gashi ka shpjeguar se periudha në shqyrtim është shoqëruar nga një krizë institucionale, e karakterizuar nga një qeveri në detyrë, një Kuvend që nuk ka funksionuar si duhet, si dhe mungesë të mekanizmave të llogaridhënies së institucioneve ndaj legjislativit. Megjithatë, ajo ka veçuar procesin zgjedhor, duke theksuar se mbajtja e tri palë zgjedhjeve gjatë këtij viti është vlerësuar nga Brukseli si një dëshmi e besueshme e demokracisë, me standarde të larta dhe pluralizëm të theksuar politik. Në këtë kontekst, Gashi ka theksuar se përpjekjet kundër krimit të organizuar dhe reforma në administratën publike mbeten pika ku është shënuar progres. Një tjetër çështje e rëndësishme që është diskutuar ka qenë Plani i Rritjes i Bashkimit Evropian. Sipas Gashit, ndonëse Kosova ishte ndër vendet e para që dorëzoi agjendën e reformave, për shkak të ngërçit politik, ajo u bë vendi i fundit në rajon që finalizoi miratimin e marrëveshjes ndërkombëtare në Kuvend. Liza Gashi ka vënë theksin edhe te kapitulli 31, i cili për herë të parë ka vlerësuar pozitivisht harmonizimin e plotë të politikës së jashtme dhe të sigurisë së Kosovës me atë të Bashkimit Evropian. 'Kosova është 100 për qind e linjëzuar me politikën e jashtme dhe të sigurisë të BE-së, përfshirë edhe sanksionet ndaj Rusisë dhe Bjellorusisë', ka deklaruar ajo. Në fund, Gashi ka përsëritur se synimi strategjik i Kosovës mbetet marrja e pyetësorit nga Komisioni Evropian, si një hap vendimtar drejt statusit të vendit kandidat. Ajo ka shtuar se, përveç punës së brendshme, nevojitet edhe një vullnet politik nga ana e Bashkimit Evropian, ndërsa Kosova duhet të jetë këmbëngulëse në adresimin e të gjitha pengesave që e ngadalësojnë rrugëtimin e saj drejt integrimit evropian.