Skandali me notat në Universitetin e Shtipit, Ministrja Janevska: Autori është identifikuar dhe do të përballet me ligjin

Autoritetet policore kanë nisur hetimet ndaj një punonjësi të Universitetit "Goce Dellçev" në Shtip, nën dyshimet se ka ndërhyrë në mënyrë të paligjshme për të ndryshuar notat dhe rezultatet e provimeve në sistemin digjital të këtij universiteti. E pyetur rreth kësaj ngjarjeje, Ministrja e Arsimit dhe Shkencës, Vesna Janevska, bëri të ditur se Ministria e Punëve të Brendshme dhe organet e drejtësisë janë duke trajtuar kallëzimin e dorëzuar. Ajo u bëri thirrje studentëve dhe mbarë opinionit publik që të mos ngurrojnë të denoncojnë çdo dukuri apo veprimtari të paligjshme. "Gjithmonë do të ketë individë që do të përpiqen të keqpërdorin sistemin, por thelbësore është që policia dhe drejtësia po reagojnë. Personi përgjegjës tashmë është zbuluar, hetimet janë në zhvillim e sipër dhe ai do të mbajë përgjegjësi të plotë ligjore për veprimet e tij të paligjshme", u shpreh Janevska. Ajo shtoi se pavarësisht procesit të digjitalizimit, ndikimi i faktorit njerëzor dhe mundësia për abuzime mbeten gjithmonë prezente, ndaj prioriteti kryesor mbetet zbulimi dhe ndëshkimi në kohë i këtyre shkeljeve. "Edhe pse platformat e fakulteteve janë elektronike, pas çdo sistemi qëndron një njeri. Mundësia për shkelje ekziston, por sukses është fakti që kemi arritur ta identifikojmë këtë rast. Kjo shërben edhe si masë parandaluese dhe mesazh i qartë për cilindo që mendon të ndërmarrë hapa të ngjashëm që të heqë dorë. Ky nuk është rasti i parë që raportohet; kudo që kemi denoncime, në terren zbatohen kontrolle nga Inspektorati Shtetëror i Arsimit, ndërkohë që disa raste të tjera tashmë ndodhen në procedurë gjyqësore dhe mbetet të shohim epilogun e tyre. Inspektoriati Arsimor nuk ka kompetenca në këtë rast, pasi hetimi po udhëhiqet drejtpërdrejt nga strukturat policore", përfundoi Janevska.