Tronditje në Bulqizë: 60-vjeçari u paraqit si i sulmuar nga ariu, por ekspertiza zbulon plagën e armës së zjarrit

Ngjarja e rëndë e regjistruar një ditë më parë në Bulqizë, ku u gjet i pajetë Urim Fiku, ka marrë një kthesë dramatike pasi autoritetet dyshojnë se bëhet fjalë për një vrasje. Lidhur me këtë ngjarje misterioze, policia ka shoqëruar në ambientet e komisariatit bashkëshortjen dhe djalin e viktimës për t'i marrë në pyetje. Në fazat e para të ngjarjes, familjarët kishin pohuar se fjalët e fundit të 61-vjeçarit kishin qenë se ishte sulmuar nga një ari, ndërkohë që trupi i tij u zbulua pa shenja jetë në zonën malore të Bulqizës. Megjithatë, dyshimet e para janë përmbysur pas ekspertizës mjekoligjore të kryer në qytetin e Tiranës. Ekspertiza e thelluar ka konfirmuar se viktimat i ishte shkaktuar një plagë vdekjeprurëse nga arma e zjarrit, konkretisht nga një plumb pistolete në zonën e gjoksit, duke hedhur poshtë versionin e sulmit nga kafsha e egër. Tashmë, grupi hetimor që vepron nën drejtimin e drejtpërdrejtë të kryeprokurorit të Dibrës, Abaz Muça, po analizon me kujdes disa pista hetimore me qëllim zbardhjen e plotë të rrethanave dhe vënien para përgjegjësisë të autorëve të këtij krimi.