Situata me fruthin në Maqedoni: Shënohet rasti i pestë, i infektuar një foshnjë

Numri i të prekurve nga fruthi në vend është rritur në pesë, pasi autoritetet shëndetësore kanë konfirmuar një rast të ri, ka bërë të ditur ministri i Shëndetësisë, Sasho Klekovski. Bëhet fjalë për një foshnjë një vjeç e gjysmë. Deri më tani, virusi është identifikuar te tre foshnja, një 45-vjeçar dhe një shtetas nga Kosova. Klekovski ka bërë të ditur se ekziston një lidhje e mundshme paraprake mes rastit të huaj dhe tre rasteve vendase, ndërsa pritet që hetimi epidemiologjik nga Instituti i Shëndetit Publik ta konfirmojë këtë zyrtarisht. Në lidhje me imunizimin, ministri u ka bërë thirrje qytetarëve që të verifikojnë statusin e tyre vaksinal, për të parë nëse kanë marrë dy dozat e nevojshme apo nëse e kanë kaluar më parë sëmundjen. Ai shtoi se nuk është pro masave të vaksinimit me detyrim, pasi sipas tij, qasje të tilla vetëm sa shtojnë rezistencën te popullata. Duke theksuar se fruthi renditet ndër infeksionet më ngjitëse virale, ku agjenti shkaktar mund të mbijetojë në ajër deri në dy orë, Klekovski ka dhënë udhëzime të qarta për qytetarët. "Qytetarët që shfaqin shenja të sëmundjes duhet fillimisht të kontaktojnë me telefon mjekun e tyre amë, në vend që të paraqiten drejtpërdrejt në institucionet shëndetësore dhe të rrezikojnë pacientët e tjerë," ka theksuar ai, duke apeluar gjithashtu prindërit që të mos i dërgojnë në çerdhe apo shkolla fëmijët që shfaqin simptoma.