Rasti “Lotaria”: Përparim Bajrami siguron lirinë përmes një garancie milionëshe

Përparim Bajrami, i pandehuri kryesor në dosjen e njohur si rasti “Lotaria”, pritet të lërë qelinë e paraburgimit, pasi Këshilli Penal pranë Gjykatës Themelore Penale në Shkup ka miratuar zyrtarisht garancinë pasurore në vlerë prej 1.140.781 eurosh, e cila përbëhet nga pasuri e paluajtshme. Sipas njoftimit zyrtar të institucionit gjyqësor, ekzekutimi i lirimit nga paraburgimi në Burgun e Shkupit do të bëhet menjëherë pasi të përfundojë procedura e regjistrimit të hipotekës në Drejtorinë për Gjeodezi dhe Kadastër. Vendimi ka marrë formë të prerë brenda ditës së sotme, pasi si prokurori publik ashtu edhe palët e tjera të përfshira në proces kanë hequr dorë vullnetarisht nga e drejta e ankimit. Përveç garancisë financiare, trupi gjykutus i ka vendosur Bajramit masa alternative për të garantuar praninë e tij gjatë gjithë procesit gjyqësor. Këto masa përfshijnë konfiskimin e pasaportës, ndalimin e pajisjes me dokumente të reja për kalimin e kufirit shtetëror, si dhe detyrimin për t'u paraqitur në mënyrë periodike në Gjykatë. Iniciativa për zëvendësimin e masës së sigurisë ishte paraqitur nga mbrojtja ligjore në datën 14 tetor. Gjatë shqyrtimit të kërkesës, Këshilli Penal mori në konsideratë edhe kufizimet ligjore të afateve të paraburgimit, të cilat në këtë fazë nuk mund të kalojnë periudhën prej 60 ditësh. Duke qenë se Bajrami ishte dorëzuar vetë më 9 shtator, afati ligjor skadon më 8 nëntor. Prokuroria Themelore Publike në Shkup kishte ngritur aktakuzë ndaj tij më 13 gusht për veprën penale të “Keqpërdorimit të pozitës dhe autorizimit zyrtar”, vepër për të cilën legjislacioni parashikon dënim me burgim deri në pesë vjet. Paraburgimi ishte caktuar më parë me kërkesë të organit të akuzës për shkak të mosgjetjes së tij nga organet e rendit. Me pranimin e garancisë dhe ndryshimin e masës së sigurisë, gjykimi ndaj Bajramit do të vijojë në gjendje të lirë.