Dhuna në familje, Prokuroria e Pejës kërkon kontroll më të rreptë dhe përgjegjësi të shtuar nga Policia

Ushtruesja e detyrës së Kryeprokurores së Prokurorisë Themelore në Pejë, Valbona Disha-Haxhosaj, ka zhvilluar një takim pune me strukturën udhëheqëse të Drejtorisë Rajonale të Policisë në Pejë, ku në qendër të vëmendjes ka qenë fuqizimi i bashkëpunimit ndërinstitucional dhe menaxhimi i rasteve me ndjeshmëri të lartë shoqërore. Në këtë takim të rëndësishëm morën pjesë ushtruesi i detyrës së drejtorit të Policisë Rajonale, major Mirsad Kelmendi, shefi i operativës, si dhe komandantët e pesë stacioneve policore që mbulojnë rajonin e Pejës, Klinës, Istogut, Deçanit dhe Junikut. Bazuar në njoftimin zyrtar të Prokurorisë, prokurorja Disha-Haxhosaj ka kërkuar një shkallë më të lartë mbikëqyrjeje dhe kontrolli mbi punën e zyrtarëve policorë gjatë procedimit të rasteve, me synimin e vetëm që të sigurohet një standard profesional dhe zbatim i përpiktë i ligjit. Fokusi kryesor i bisedës u orientua nga trajtimi i rasteve të dhunës në familje, mbrojtja e të miturve, si dhe domosdoshmëria e një reagimi të menjëhershëm në terren dhe bashkërendimit efikas mes organeve kompetente. Po ashtu, ajo kërkoi angazhim maksimal dhe kujdes të shtuar në mbrojtjen e viktimave, duke vënë theksin te roli i pazëvendësueshëm i institucioneve në ofrimin e një sigurie të plotë dhe mbështetjeje adekuate për to. Diskutimet gjatë këtij takimi prekën edhe çështjen e parandalimit të krimeve, zbulimin e hershëm të situatave të rrezikshme dhe ndërmarrjen e hapave të shpejtë ligjorë për të garantuar rend dhe qetësi publike.