Tragjedi familjare në Itali: I riu shqiptar ekzekuton me thikë nënën e tij dhe dorëzohet në polici

Një ngjarje e rëndë ka tronditur thellësisht komunitetin shqiptar në shtetin fqinj, ku një djalë 21-vjeçar dyshohet se i ka marrë jetën me thikë nënës së tij 39-vjeçare brenda banesës së tyre, e cila ndodhet në qytetin Chiari të provincës së Breshias. Burimet konfirmojnë se viktima është shtetasja Meleqe Lusha, ndërsa autori i dyshuar i këtij krimi makabër është vetë i biri i saj. Kjo familje me origjinë nga Shqipëria ishte vendosur prej vitesh në këtë zonë. Sipas hetimeve paraprake, akti i rëndë dyshohet të jetë kryer gjatë orëve të natës, mes datave 2 dhe 3 nëntor. Menjëherë pas krimit, i riu është larguar nga vendi i ngjarjes dhe është drejtuar për në stacionin e Karabinierëve në Kremona, ku është dorëzuar vullnetarisht dhe ka pranuar aktin e kryer. 39-vjeçarja e ndjerë e kishte rritur të birin e saj e vetme, duke u mbështetur edhe te ndihma e vëllezërve të saj. Ata banonin prej kohësh në Chiari dhe vetëm në muajin gusht kishin hyrë në shtëpinë e tyre të re. Të dhënat nga mjedisi lokal tregojnë se 21-vjeçari kishte përfunduar shkollën në atë qytet dhe ishte i punësuar në një nga fabrikat e zonës. Kryetari i shoqatës së shqiptarëve në Chiari, Dennis Beqiri, ka reflektuar tronditjen e madhe të komunitetit, duke e cilësuar të riun si një djalë të edukuar, punëtor dhe mjaft të respektuar. “Jemi të tronditur. Nuk i dimë arsyet e këtij veprimi dhe nuk arrijmë ta kuptojmë”, ka deklaruar ai. Reagime ka pasur edhe nga kryetari i Bashkisë së Chiari-t, Gabriele Zotti, i cili ka shprehur ngushëllimet dhe mbështetjen për familjen e viktimës. Ndërkohë, organet e rendit dhe drejtësisë në Itali po vijojnë hetimet intensive për të zbuluar motivet e vërteta dhe për të sqaruar plotësisht rrethanat e kësaj tragjedie të rëndë.