Operacion policor në Shkup e Shtip: Në shënjestër zyrtari i lartë i Universitetit 'Goce Dellçev'

Forcat e rendit kanë ndërmarrë një aksion të gjerë me bastisje në disa adresa të ndryshme në Shkup dhe Shtip, duke vënë nën hetim drejtuesin e departamentit të it-së në Universitetin “Goce Dellçev” (UGD). Personi në fjalë po hetohet nën dyshimet për përfshirje në vepra penale që lidhen me shpërdorimin e pozitës zyrtare, si dhe ndërhyrje e dëmtim të sistemeve kompjuterike. Sipas njoftimit zyrtar nga Ministria e Punëve të Brendshme, aksioni po zhvillohet në bazë të urdhëresave gjyqësore të lëshuara me kërkesë të Prokurorisë Themelore Publike në Shtip. Objekt i këtyre kontrolleve është R.T., i cili mban pozitën e udhëheqësit të sektorit të informatikës në këtë universitet. Autoritetet policore kanë bërë të ditur se detajet shtesë rreth rezultatit të operacionit do të bëhen publike pas mbylljes përfundimtare të hetimeve në terren. Në këtë operacion janë angazhuar njësi të specializuara, përfshirë zyrtarë nga Departamenti i Policisë Kriminalistike, Sektori për Krim Kompjuterik pranë MPB-së, si dhe strukturat rajonale të punëve të brendshme në Shkup dhe Shtip. Pas zhvillimit të ngjarjeve, ka reaguar zyrtarisht edhe Rektorati i Universitetit “Goce Dellçev” në Shtip, duke theksuar se institucioni do të bashkëpunojë ngushtë dhe pa asnjë rezervë me organet e rendit dhe prokurorinë, me qëllim zbardhjen e shpejtë dhe të plotë të situatës. Nga ky universitet u bë e ditur se zbatojnë parimin e tolerancës zero ndaj korrupsionit dhe çdo forme të abuzimit brenda mjedisit akademik, duke vlerësuar se veprime të tilla kontribuojnë në garantimin e një cilësie më të lartë dhe objektiviteti në procesin studimor. "Garantojmë komunitetin tonë akademik, studentët, stafin pedagogjik dhe administrativ, si dhe mbarë opinionin publik, se UGD mbetet i palëkundur në mbrojtjen e vlerave akademike, integritetit dhe transparencës, duke luftuar në mënyrë proaktive çdo dukuri negative. Fokusi ynë kryesor mbetet te studentët dhe arsimimi i tyre. Mësimdhënia, angazhimet akademike, kërkimet shkencore dhe bashkëpunimi ndërkombëtar me universitete prestigjioze evropiane vijojnë të jenë prioritet absolut i yni", thuhet në deklaratën e UGD-së.