Kryeministri Rama nga Brukseli: Serbia duhet të pranojë Kosovën dhe të zbatojë kushtet e BE-së

Kryeministri i Shqipërisë, Edi Rama, ka adresuar procesin e integrimit evropian të Ballkanit Perëndimor, duke u ndalur te qasja dhe pozicioni i Serbisë në zhvillimet rajonale. Gjatë një prononcimi për ngjarjen “Euronews Enlargement Summit” në Bruksel, kreu i ekzekutivit shqiptar theksoi se edhe pse anëtarësimi i Serbisë në Bashkimin Evropian mbetet i rëndësishëm për paqen dhe sigurinë, Beogradi zyrtar detyrohet të japë dëshmi reale, të respektojë standardet e kërkuara nga BE-ja dhe përfundimisht të njohë Republikën e Kosovës. “Ajo çfarë di është që fituesi në Beograd nuk tregon hapjen për mua dhe shqiptarët, që është njohja e çështjes së Kosovës. Kjo nënkupton që muzika në Beograd nuk do të ndryshojë,” deklaroi ai. Duke analizuar dinamikat gjeopolitike, Rama shtoi se rajoni ynë mbetet ende jashtë familjes evropiane dhe se vendet tona zakonisht janë në pozitën e atyre që dëgjojnë këshilla e jo që i japin ato, ndonëse Serbia përbën një gurthemel në mozaikun e Ballkanit Perëndimor. “Kam qenë avokat që nuk duhet ta lëmë Serbinë të shkojë në drejtimin e gabuar dhe të braktisë projektin evropian. Nga ana tjetër, e dimë si shkojnë gjërat,” u shpreh më tej ai, duke vënë në pah qëndrimet hezituese të Serbisë si ndaj Kosovës, ashtu edhe lidhur me harmonizimin e politikës së jashtme për sanksionet ndaj Rusisë. Në përmbyllje, shefi i qeverisë shqiptare nënvizoi se Serbia duhet domosdoshmërisht të rreshtohet krah vendeve perëndimore dhe të integrohet plotësisht në Bashkimin Evropian, por kjo kërkon që ajo të dëshmojë rezultate të prekshme dhe të përmbushë detyrimet e panegociueshme me Brukselin.