Rama nga Brukseli: Beogradi mbetet i panërgjegjshëm për Kosovën, Shqipëria synon mbylljen e negociatave në 2027

Kryeministri i vendit, Edi Rama, ka trajtuar sfidat kryesore të procesit të zgjerimit dhe rrugëtimit evropian të Ballkanit Perëndimor, gjatë një interviste të dhënë për gazetaren Maria Tadeo në kuadër të samitit “Euronews Enlargement Summit”. Kreu i Qeverisë shqiptare u përqendrua te raportet e tensionuara mes Serbisë dhe Kosovës, si dhe te qëndrimi i Beogradit zyrtar ndaj bllokut evropian. Gjatë kësaj bashkëbisedimi, ai ritheksoi se ambicia kryesore e ekzekutivit shqiptar mbetet përfundimi i negociatave për anëtarësim brenda afatit të vitit 2027. Duke iu përgjigjur pyetjeve rreth dinamikave politike në Serbi pas ndryshimeve në udhëheqje, Rama u shpreh se udhëheqja e re në Beograd nuk ka shfaqur asnjë shenjë reflektimi apo hapjeje për çështjen e Kosovës, e cila mbetet prioritet jetik për të. Sipas tij, qasja e Serbisë mbetet e pandryshuar, ndërsa shtoi se vendi fqinj duhet të përmbushë standardet dhe të japë rezultate konkrete, veçanërisht në raport me Kosovën dhe qëndrimin ndaj Rusisë, për të merituar anëtarësimin në Bashkimin Europian. Në lidhje me perspektivën e vendeve të tjera kandidate dhe mundësinë e integrimit të Malit të Zi apo pozicionimin e Shqipërisë në garën drejt BE-së, Rama tregohet i rezervuar bazuar në eksperiencën e tij afatgjatë. Ai theksoi se gjatë viteve ka parë shumë afate kohore që janë shpërbërë rrugës, duke dëshmuar se Bashkimi Europian herë ka dështuar të mbajë premtimet dhe herë ka tejkaluar pritshmëritë. Pavarësisht pasigurive në horizontin evropian, Rama nënvizoi se fokusi i vetëm i Tiranës mbetet puna intensive dhe e pandalur në terren, me qëllim që Shqipëria të përmbushë të gjitha detyrimet e saj institucionale dhe të mbyllë zyrtarisht kapitujt e negociatave deri në fund të vitit 2027.