Altin Krasniqi: Rezoluta për Specialen është e pamjaftueshme, kërkohen ndryshime ligjore

Deputeti i Partisë Demokratike të Kosovës, Altin Krasniqi, ka vlerësuar se miratimi i deklaratës së sotme në Kuvendin e Kosovës është një hap pozitiv, mirëpo sipas tij, ky veprim mbetet i pamjaftueshëm për të adresuar sfidat reale në lidhje me proceset gjyqësore në Hagë. Sipas Krasniqit, i cili është djali i Jakup Krasniqit, reagimi institucional duhet të jetë shumë më substancial. Ai ka theksuar se përderisa nuk ndërmerren hapa konkretë për ndryshimin e ligjit për Dhomat e Specializuara, përpjekjet e deritanishme nuk mund të konsiderohen si zgjidhje efektive kundër aktgjykimeve dënuese. “Nisma e sotme është një shenjë e mirë, por pa ndryshimet e nevojshme ligjore, nuk kemi arritur asgjë konkrete. Mbrojtja e vlerave të Ushtrisë Çlirimtare të Kosovës dhe luftës sonë të drejtë kërkon vendime të guximshme dhe veprime që reflektojnë të vërtetën historike që qytetarët tanë e njohin prej kohësh”, ka deklaruar deputeti Krasniqi.