Operacioni 'Rydox': Ardit Kutleshi pranon fajësinë në SHBA, vlerësohet bashkëpunimi mes Prishtinës dhe Uashingtonit

Ardit Kutleshi, 28-vjeçari nga Kosova, ka dalë para drejtësisë amerikane ku ka pranuar zyrtarisht akuzat që rëndojnë mbi të për krijimin dhe menaxhimin e platformës ilegale 'Rydox'. Ky treg digjital shërbente si një qendër për kriminelët kibernetikë, duke mundësuar tregtimin e të dhënave personale të vjedhura, si dhe shpërndarjen e mjeteve të sofistikuara për sulme kibernetike dhe mashtrime. Bazuar në të dhënat e gjykatës, platforma në fjalë ka qenë aktive që nga viti 2016. Gjatë kësaj periudhe, përmes 'Rydox' janë realizuar mbi 7,600 transaksione të paligjshme, duke përfshirë shitjen e informacioneve të identitetit (PII) dhe shërbimeve të ndryshme kriminale, të cilat i kanë sjellë autorit të tyre të ardhura prej të paktën 232 mijë dollarësh. Sipas FBI-së, shumica dërrmuese e të dhënave të vjedhura i përkisnin shtetasve amerikanë. Kutleshi është deklaruar fajtor para Gjykatës së Qarkut Perëndimor të Pensilvanisë për veprat penale të vjedhjes së rëndë të identitetit dhe konspiracionit për pastrim parash. Trupi gjykues ka caktuar datën 9 shkurt 2027 për shpalljen e dënimit ndaj tij. Në lidhje me këtë sukses të drejtësisë, Ambasada e Shteteve të Bashkuara të Amerikës në Prishtinë ka publikuar një reagim zyrtar, ku ka vlerësuar lart koordinimin mes institucioneve kosovare dhe atyre amerikane në luftën kundër krimit kibernetik ndërkufitar. Në deklaratën e ambasadës thuhet: 'Një tjetër shembull i bashkëpunimit të suksesshëm SHBA–Kosovë në luftën kundër krimit kibernetik ndërkufitar. Faleminderit Prokurorisë Speciale të Republikës së Kosovës, institucioneve të Kosovës dhe të gjithë të përfshirëve për bashkëpunimin e shkëlqyer në sjelljen e këtij rasti para drejtësisë!'