Përplasje në Kuvend për Autoritetin e Konkurrencës: Opozita kërkon hetim nga Prokuroria Speciale

Përfaqësuesit e opozitës kanë ngritur alarmin në lidhje me funksionimin e Autoritetit të Konkurrencës, duke hedhur dyshime të forta mbi parregullsitë në menaxhimin e këtij dikasteri, bllokimin e mandatit të dy anëtareve dhe mungesën e seancave vendimmarrëse pavarësisht pranisë së kuorumit. Këto shqetësime u diskutuan brenda Komisionit për Ekonomi, Industri, Ndërmarrësi, Tregti dhe Inovacion, ku ishte parashikuar që anëtarët e Komisionit të Autoritetit të Konkurrencës të raportonin mbi zhvillimet e fundit. Megjithatë, procesi i raportimit dështoi për shkak të mungesës së deputetëve të Lëvizjes Vetëvendosje në sallë. Kryetari i këtij komisioni, Arben Mustafa, i cili vjen nga radhët e PDK-së, theksoi se që nga muaji maj i vitit 2025 nuk është realizuar asnjë mbledhje e Komisionit të Konkurrencës, pavarësisht se kushtet për kuorum kanë qenë të plotësuara. Ai kërkoi llogari nga kryetarja e institucionit, Binaku-Isufi, lidhur me bazën ligjore që ka shërbyer për t'i pamundësuar ushtrimin e detyrës dy zyrtareve të zgjedhura nga Kuvendi. Duke folur për këtë çështje, Mustafa u shpreh se dokumentacioni dëshmon se dy anëtareve të emëruara nga Kuvendi i Kosovës u është mohuar e drejta e ushtrimit të mandatit për një kohë të gjatë. Ai ngriti gjithashtu çështjen e moszbatimit të vendimit të Këshillit të Pavarur Mbikëqyrës për Shërbimin Civil të Kosovës në lidhje me drejtorin e përgjithshëm, i cili, sipas tij, vazhdon punën normalisht pavarësisht se ndaj tij rëndojnë dy aktakuza. Nga ana e tij, deputeti i Aleancës për Ardhmërinë e Kosovës, Burim Ramadani, e cilësoj situatën aktuale si tejet alarmante, duke përmendur pretendimet e ndërsjella për shkelje ligjore mes menaxhmentit dhe anëtarëve të institucionit. Ramadani theksoi se ekzistojnë dy versione krejtësisht kontradiktore për gjendjen atje, çka e bën situatën urgjente. Sipas tij, bojkoti i seancës nga ana e deputetëve të mazhorancës dhe përfaqësuesve të komuniteteve dëshmon një ikje të qëllimshme nga mbikëqyrja parlamentare. Përballë kësaj situate, ai bëri thirrje publike që Prokuroria Speciale të përfshihet dhe të hetojë në detaj secilën rrethanë të krijuar. Debatit iu bashkua edhe deputeti i PDK-së, Mërgim Lushtaku, i cili ashpërsoj tonet ndaj mungesës së mazhorancës në komision, duke pretenduar se Autoriteti i Konkurrencës ka lënë pa mbajtur mbledhje për periudhën e 40 muajve të fundit, duke lënë pa shqyrtuar qindra tenderë me rëndësi, përfshirë edhe ata të ndërmarrjes KEK.