Zgjedhja e presidentit, Hykmete Bajrami: Mbështes çdo kandidat që vjen nga radhët e LDK-së

Deputetja e Lidhjes Demokratike të Kosovës, Hykmete Bajrami, ka deklaruar se nuk posedon asnjë njoftim zyrtar lidhur me zhvillimin e ndonjë takimi të mundshëm mes liderit të Lëvizjes Vetëvendosje, Albin Kurti, dhe kryetarit të LDK-së, Lumir Abdixhiku, në kontekstin e procesit për zgjedhjen e presidentit të ri. E pyetur nga gazetarët mbi mundësinë e negociatave për këtë çështje, Bajrami u shpreh e rezervuar, duke theksuar se nuk dëshiron të ndërtojë supozime mbi zhvillimet politike. Ajo sqaroi se nuk ka informacione për bisedime të reja ndërmjet dy liderëve dhe se nuk është në dijeni për ndonjë emër konkret që mund të jetë në tryezën e diskutimeve. Megjithatë, ligjvënësja e LDK-së konfirmoi qëndrimin e saj lidhur me votimin e një kandidati eventual. Ajo u shpreh prerazi se në rast se partia e saj, Lidhja Demokratike e Kosovës, do të propozojë një kandidat për postin e të parit të shtetit, ajo do ta mbështesë atë me votën e saj pro. “Për besë nuk kam asnjë informacion. Sapo dola nga seanca dhe nuk kam pasur diskutime për këtë temë. Nuk mund të bëj presupozime, por nëse LDK-ja del me kandidat, unë do të votoj pro”, deklaroi Bajrami. Vlen të theksohet se në të kaluarën, Bajrami kishte qenë ndër deputetet e LDK-së që kishin refuzuar ta mbështesnin kandidaturën e Bekim Sejdiut për pozitën e presidentit.