Prania e aflatoksinave në treg: Ardian Gjini kujton paralajmërimin e 22 tetorit dhe akuzon Qeverinë për neglizhencë

Kryetari i Aleancës, Ardian Gjini, ka bërë një reagim të fortë pas konfirmimit zyrtar se në tregun e Kosovës janë gjetur sasi të aflatoksinave që kalojnë normat e lejuara. Ai ka rikujtuar se ky skandal ishte ngritur prej tij që më 22 tetor gjatë një paraqitjeje televizive në emisionin “Context” me Leart Hoxhën në ATV. Gjini u shpreh se koha dëshmoi vërtetësinë e fjalëve të tij, duke shprehur shqetësimin e thellë për rrezikun që këto përbërje i kanosen drejtpërdrejt shëndetit publik. “Me datë 22 tetor, në emisionin Context me Leart Hoxhën në ATV e paralajmërova me saktësi këtë super skandal. Sot, ajo që ne paralajmëruam doli e vërtetë, pikë për pikë!”, ka shkruar ndër të tjera Gjini. Më tej, ai ka shpjeguar se aflatoksinat janë elemente tejet helmuese që jo vetëm dëmtojnë blegtorinë, por përmes qumështit depërtojnë lehtësisht te konsumatorët, duke rrezikuar shëndetin e fëmijëve dhe të mbarë familjeve kosovare. Sipas kreut të Aleancës, ky rast dëshmon dështimin dhe shkujdesjen e vazhdueshme të ekzekutivit përballë sfidave të sigurisë ushqimore, ndërkohë që opozita ka ngritur alarmin në mënyrë të përsëritur. “Kjo që po ndodhë është pasqyrë e një pushteti që neglizhon sigurinë tonë kombëtare dhe ushqimore”, ka deklaruar ai. Në mbyllje të reagimit të tij, Gjini ka kërkuar masa urgjente mbrojtëse, llogaridhënie institucionale dhe ka fajësuar ashpër Qeverinë për pasivitetin e treguar përballë ngjarjeve që cënojnë në mënyrë kritike shëndetin e qytetarëve.