Flick thyen heshtjen për Alejandro Balden: Po bëj çmos t'ia kthej vetëbesimin

Trajneri i Barcelonës, Hansi Flick, ka trajtuar situatën e brishtë të mbrojtësit Alejandro Balde, teksa skuadra përgatitet për sfidën e radhës ndaj Aston Villas në kuadër të xhiros së katërt të Ligës së Kampionëve. Strategu gjerman ka theksuar rëndësinë e ruajtjes së besimit te lojtari, sidomos në një periudhë kur qarkullojnë zëra se 23-vjeçari mund të kërkojë një largim të mundshëm gjatë merkatos së janarit për të siguruar më shumë hapësira dhe për të rifituar formën e dikurshme. Pas vendimit për ta lënë në stol në ndeshjen e fundjavës ndaj Alavésit, tekniku u tregua tejet mbështetës ndaj futbollistit, duke konfirmuar se ka pasur një bashkëbisedim direkt me të. “Është një situatë e natyrshme kjo që po kalon. Mungesa e vazhdimësisë në fushë sjell ulje të besimit. E vlerësoj për angazhimin në stërvitje, megjithatë detyra jonë është të bëjmë zgjedhjen më të mirë për interesat e ekipit, duke marrë parasysh edhe formën e shkëlqyer që po kalon João Cancelo”, u shpreh Flick. Sipas trajnerit, vendimet e marra nuk kanë asnjë prapavijë personale, pasi interesi i skuadrës mbetet mbi çdo gjë tjetër. “Kur flas për rënie të besimit, jam i vetëdijshëm se kjo mund ta rëndojë psikologjikisht lojtarin, prandaj kam biseduar privatisht me të pas daljes sime të fundit për media. E respektoj pamasë. Është një djalë i ri, me vlera të larta morale dhe një punëtor i palodhur. Po bëj të pamundurën për ta ndihmuar të rimarrë veten dhe të kapë sërish standardet e tij më të mira”, shtoi më tej ai. Pavarësisht kontratës që e mban të lidhur me katalanasit deri në verën e vitit 2028, mbrojtësi mbetet në qendër të vëmendjes nga disa skuadra të Premier Ligës që po ndjekin nga afër zhvillimet rreth tij.