Mbështetje më e madhe financiare për ish-krerët e UÇK-së në Hagë, paralajmëron Kurti

Kryeministri i Kosovës, Albin Kurti, ka konfirmuar se qeveria që ai drejton do të intensifikojë ndihmën institucionale për ish-udhëheqësit e Ushtrisë Çlirimtare të Kosovës që po përballen me procesin gjyqësor në Hagë. Këto deklarata shefi i ekzekutivit i bëri gjatë mbledhjes së Qeverisë të mbajtur pasditen e sotme, ku u diskutua dhe u miratua projektbuxheti për vitin 2027. Gjatë prezantimit të ndarjeve buxhetore, Kurti theksoi se brenda këtij plani është krijuar një zë i posaçëm financiar dedikuar mbrojtjes juridike të ish-krerëve të UÇK-së. “Do të ketë rritje të mbështetjes për katër ish-udhëheqësit e UÇK-së, sipas kërkesës së parashtruar nga ekipet mbrojtëse. Sigurisht që për pjesën tjetër të angazhimit dhe mbështetjes, e presim edhe strategjinë nga grupi punues, i cili kryesohet nga zëvendëskryeministri Glauk Konjufca”, ka deklaruar kryeministri Kurti.