Buxheti i Kosovës për vitin 2027 kap shifrën 4.27 miliardë euro, mbi 900 milionë për komunat

Ekzekutivi i Kosovës ka bërë publike shifrat e projektbuxhetit për vitin 2027, i cili kap vlerën e përgjithshme prej 4.27 miliardë eurosh. Gjatë prezantimit, kryeministri Albin Kurti theksoi se ky plan financiar shënon një rritje prej 200 milionë eurosh krahasuar me buxhetin e rishikuar të vitit 2026, si dhe 300 milionë euro më shumë sesa ai bazë i po këtij viti. Ai veçoi gjithashtu se nga kjo shumë, plot 908 milionë euro do t'i dedikohen drejtpërdrejt financimit të pushtetit lokal. “Në buxhetin që po e prezantojmë sot për vitin 2027, ATK-ja parashihet të mbledhë sa 60 për qind e të hyrave që do të mbledhë dogana. Sivjet, përkundër sfidave me të cilat po ballafaqohemi edhe ne krahas gjithë botës, rritja ekonomike ka shënuar nivelet prej 5,4 dhe 4,1 për qind për tremujorin e parë dhe tremujorin e dytë. Kjo na vendos te vendet me rritjen më të shpejtë në rajon dhe më gjerë. Kjo nënkupton edhe rritjen në vazhdimësi të buxhetit dhe qëndrueshmërinë e financave publike. Për vitin 2027, buxheti i projektuar parasheh nivelin prej 4,27 miliardë euro ose 200 milionë euro më shumë se buxheti i rishikuar për 2026 dhe për 300 milionë euro më i lartë se sa buxheti bazë i vitit 2026. Nga ky buxhet, 908 milionë euro do të shkojnë si financim direkt për komunat. Ky është buxhet rekord edhe për komunat e Kosovës dhe kjo rritje vjen si rezultat i rritjeve të vazhdueshme të granteve qeveritare”, u shpreh Kurti. Pas kalimit në qeveri, ky projektligj do t'i dërgohet Kuvendit të Kosovës për shqyrtim dhe miratim përfundimtar. Megjithatë, ky hap është shoqëruar me debate politike, ku deputetë nga radhët e LDK-së kanë ngritur kritika ndaj Qeverisë, duke e akuzuar se ka shkelur afatet ligjore të parapara për procedimin e buxhetit të vitit 2027.