Alarm antiterrorizëm në Britani: Vëmendja përqendrohet te baza strategjike pas sinjalizimit të një fermereje

Një banore vendase është shndërruar në dëshmitaren kyçe të hetimit lidhur me ngjarjen e ndodhur pranë bazës ajrore RAF Fairford në Mbretërinë e Bashkuar, pasi sinjalizoi policinë për praninë e tri furgonëve të bardhë që i dukën të dyshimtë. Ngjarja alarmante u regjistrua rreth orës 00:45 të së dielës, kur u dha sinjali për lëvizjen e tre mjeteve të dyshimta drejt perimetrit të bazës ushtarake RAF Fairford. Siç raporton mediumi britanik BBC, dëshmitarja kontaktoi fillimisht Ministrinë e Mbrojtjes pasi vuri re mjetet, por pa arritur të lidhej, ndaj në orën 01:36 ajo i drejtoi thirrjen e saj numrit të emergjencës 999. Ajo kishte pikuar furgonat dhe persona të maskuar ndërsa po kthehej në shtëpi me automjetin e saj pas një mbrëmjeje festive. Si pasojë e këtij alarmi, pesë persona ranë në pranga nën dyshimin se po përgatisnin një akt terrorist. Të dyshuarit ndodhen aktualisht nën masën e paraburgimit, ndërkohë që strukturat e sigurisë po vijojnë hetimet intensive për të zbardhur plotësisht prapaskenat e këtij incidenti. Në kuadër të masave të sigurisë, banorët e 85 shtëpive në vendbanimin Whelford, që ndodhet në afërsi të bazës, u detyrohen të evakuoheshin dhe ende nuk kanë marrë leje për t'u kthye në banesat e tyre. Pavarësisht zhvillimeve, shumë pikëpyetje mbeten pa përgjigje. Autoritetet ende nuk kanë zbuluar identitetet e pesë personave të ndaluar dhe mbetet mister nëse ka të tjerë të përfshirë në këtë skemë apo cili ishte objektivi i tyre konkret. Një tjetër paqartësi mbetet mënyra se a ishte pikërisht ky sinjalizim që vuri në lëvizje organet e rendit, ndërkohë që presidenti amerikan Donald Trump ka bërë të ditur se strukturat e inteligjencës së Shteteve të Bashkuara i kishin mbajtur nën vëzhgim këta individë për një periudhë të gjatë kohe. Baza ajrore RAF Fairford është shfrytëzuar nga Forcat Ajrore Amerikane për ndërmarrjen e operacioneve dhe sulmeve ndaj Iranit, një fakt ky që ka intesifikuar edhe më shumë interesin publik dhe nivelin e gadishmërisë rreth këtij incidenti.