Çështja e Presidentit, Tahiri kritikon ashpër qasjen e Vetëvendosjes: Mungon serioziteti dhe reflektimi institucional

Shefi i Grupit Parlamentar të Aleancës për Ardhmërinë e Kosovës, Besnik Tahiri, ka shprehur shqetësimin e tij se Lëvizja Vetëvendosje nuk po tregon asnjë shenjë reflektimi lidhur me procesin e zgjedhjes së Presidentit të ri të vendit. Në një prononcim pas përfundimit të seancës plenare të Kuvendit të Kosovës, deputeti Tahiri vlerësoi se situata aktuale politike paraqet vetëm një vazhdimësi të tendencave të përsëritura tash e sa kohë nga pushteti. Duke qenë se kanë mbetur vetëm tetë ditë afat për t'i dhënë zgjidhje çështjes së kreut të shtetit, Tahiri theksoi se Kosova kërkon qasje serioze dhe jo shpërfillje të realitetit politik. "Po e shoh që ka një injorim të një situate shumë reale. Më 6 tetor, ose shkojmë në zgjedhje, ose vazhdojmë me rrugëtimin shtetëror... A kuptoni që është totalisht e pakuptueshme që ne të mos flasim për problemet reale që janë në Kosovë? Na ka hyrë debati se kush është më patriot e kush spiun, kush është i majtë e kush i djathtë... Kosova ka nevojë për seriozitet, për reflektim për shkak se kanë mbetur edhe tetë ditë deri te një vendim. Nuk shoh proces serioz, nuk shoh reflektim të situatës, shoh vazhdimësi të një situate e cila po na përsëritet," u shpreh ndër të tjera ai. Gjatë kësaj paraqitjeje për media, Tahiri ka komentuar edhe miratimin e deklaratës për katërshen e Ushtrisë Çlirimtare të Kosovës në Kuvend, duke e vlerësuar atë si një hap të vonuar por tejet të domosdoshëm për interesat e vendit dhe të ish-krerëve që po mbahen në Hagë. "Një seancë bukur e rëndësishme, e cila është shumë e vonshme. Kuvendi i Kosovës, deputetët të cilët e votuan një deklarim politik shtetëror të Kuvendit është më e pakta që do të mund të bënim, kjo do të duhej të bëhej më herët... Siç e dini, Aleanca është subjekti politik që ka kërkuar të ketë deklarim dhe jam shumë i lumtur që kemi dhënë kontributin tonë, por njëkohësisht edhe në shtyrjen përpara të një agjende shtetërore, që është bukur e rëndësishme për shtetin por edhe katër çlirimtarët tanë," përfundoi Tahiri.