Zgjedhja e presidentit, Hykmete Bajrami: Mbështes çdo kandidat që vjen nga radhët e LDK-së

Anëtarja e Kryesisë së Lidhjes Demokratike të Kosovës (LDK), Hykmete Bajrami, është deklaruar lidhur me mundësinë e një takimi mes liderit të partisë së saj, Lumir Abdixhiku, dhe kryeministrit Albin Kurti, për t’u diskutuar çështja e postit të presidentit. Ajo ka bërë të ditur se nuk disponon asnjë informacion zyrtar mbi takime të mundshme mes dy krerëve të partive. E pyetur nga gazetarët nëse ka pasur ndonjë zhvillim të brendshëm në parti për këtë temë, Bajrami u shpreh se nuk ka pasur diskutime të tilla brenda strukturave të LDK-së. “Nuk kemi diskutuar. Unë personalisht nuk kam diskutuar dhe nuk kam asnjë informatë në lidhje me këtë çështje”, deklaroi ajo. Sa i përket kandidaturave të mundshme për kreun e shtetit, deputetja Bajrami theksoi se nuk dëshiron të bëjë spekulime me emra, megjithatë shprehu qëndrimin e saj të prerë sa i përket votimit. Sipas saj, mbështetja për një kandidat do të varet nga personaliteti i propozuar, por nënvizoi se nëse LDK-ja del me një kandidat të saj, ajo do ta mbështesë atë me votë. Kujtojmë se Gjykata Kushtetuese ka përcaktuar qartë se mandati për zgjedhjen e presidentit të ri përfundon më 6 tetor 2026. Në rast se Kuvendi i Kosovës dështon të zgjedhë presidentin brenda këtij afati, legjislatura do të shpërndahet automatikisht, duke e çuar vendin drejt zgjedhjeve të parakohshme parlamentare, të cilat do të duhet të organizohen brenda një periudhe prej 45 ditësh.