Shtyhet afati: Qeveria mban në fuqi TVSH-në e ulur për naftën deri më 12 tetor

Ekzekutivi ka vendosur të zgjasë deri më 12 tetor aplikimin e TVSH-së së reduktuar për derivatet e naftës, e cila mbetet në nivelin prej 10 për qind në vend të 18 për qind. Lajmi është bërë i ditur nga ministrja e Financave, Gordana Dimitrieska-Koçoska, e cila theksoi se ky hap dëshmon përkushtimin e vazhdueshëm të Qeverisë në mbrojtjen e buxhetit familjar dhe forcimin e ekonomisë kombëtare. “Me vazhdimin e kësaj mase ndikojmë drejtpërdrejt në çmimet me pakicë të karburanteve dhe kufizojmë bartjen e presioneve të jashtme të çmimeve mbi çmimet e produkteve dhe shërbimeve të tjera. Reagojmë në kohë dhe me përgjegjësi, duke ndjekur zhvillimet në tregjet ndërkombëtare dhe duke marrë masa kur është e nevojshme për të mbrojtur standardin e qytetarëve”, ka shkruar ministrja Dimitrieska-Koçoska në rrjetet sociale. Vendimi për uljen e taksës së vlerës së shtuar për naftën nga 18 në 10 për qind kishte nisur jetësimin më 15 shtator, me synim parësor lehtësimin e barrës financiare për qytetarët përballë lëvizjeve të çmimeve. Ndërkohë, gjatë ditës së sotme pritet që Komisioni Rregullator për Energjetikë të shpallë tarifat e reja maksimale të karburanteve, të cilat do të jenë të vlefshme përgjatë javës së ardhshme.