Vrasja e Arlinda Zekajt: Albulena Haxhiu kërkon angazhimin e Prokurorisë Speciale për zyrtarët institucionalë

Kryetarja e Kuvendit të Kosovës, Albulena Haxhiu, ka kërkuar zyrtarisht që Prokuroria Speciale të marrë në dorë hetimet lidhur me vrasjen e Arlinda Zekajt, duke vënë theksin te verifikimi i veprimeve dhe mosveprimeve të strukturave shtetërore. Këtë deklaratë ajo e bëri pas mbledhjes së Kryesisë së Kuvendit, ku njoftoi se Komisioni Hetimor Parlamentar ndodhet në fazën e konstituimit dhe do të hetojë me detajet përgjegjësinë institucionale në këtë ngjarje. Haxhiu premtoi bashkëpunim të plotë me komisionin, duke u bërë thirrje të gjithë dëshmitarëve të ftuar që t'i përgjigjen thirrjes së deputetëve. Sipas kryetares së Kuvendit, duke qenë se në këtë rast bëhet fjalë për përfshirjen e mundshme të zyrtarëve të lartë, kryeprokurorëve, prokurorëve dhe pjesëtarëve të policisë, çështja i takon natyralisht kompetencës së Prokurorisë Speciale për një hetim të gjithanshëm. Ajo shtoi se ky Komision Hetimor do të shërbejë si një mekanizëm shtesë për të hartuar një raport përfundimtar, i cili më pas do t'i dorëzohet organit të akuzës. “Pa dyshim që prokuroria do të duhej të merrej me hetime në këtë rast, përkatësisht do të duhej që Prokuroria Speciale të jetë e angazhuar për të bërë hetime në raport me veprimet dhe mosveprimet apo veprimet e gabuara të secilit zyrtar në rastin e vrasjes tragjike të Arlinda Zekaj. Pra, Komisioni Hetimor është vetëm një mekanizëm shtesë që do të përpilojë në fund dokument për këtë rast dhe do ta drejtojë në prokurorinë përgjegjëse, uroj që ajo të jetë Prokuroria Speciale, për shkak se këtu përfshihen zyrtarë të lartë, përfshihen kryeprokurorë, prokurorë, policë, zyrtarë të tjerë të institucioneve, prandaj bie në fushëveprimtarinë e kësaj prokurorie”, u shpreh Haxhiu.