Zelensky shfaqet i hapur për një ballafaqim direkt me Putinin në Turqi: Ankara mund të luajë rol kyç

Kreu i shtetit të Ukrainës, Volodymyr Zelensky, ka deklaruar hapur se është i përgatitur të zhvillojë një takim kokë më kokë me homologun e tij rus, Vladimir Putin, në territorin turk, duke vënë në pah mbështetjen e tij që lideri turk Rexhep Tajip Erdogan të ndërmjetësojë këtë proces. Gjatë një prononcimi për CNN Turk, Zelensky theksoi domosdoshmërinë e bisedimeve direkte në nivel presidencial, pasi sipas tij, kontaktet e deritanishme ndërmjet dy shteteve nuk kanë sjellë ndalur agresionin ushtarak rus. “Ne jemi gati për këtë takim në Turqi. E di që Presidenti Erdogan ka kontaktet e tij me Putinin. Kjo është arsyeja pse ne mbështesim mbajtjen e një takimi në Turqi“, u shpreh ndër të tjera numri një i Kievit. Ai vlerësoi se një bisedë e drejtpërdrejtë do të shërbente për të zgjidhur ngërçet që kanë mbetur pezull gjatë bisedimeve mes delegacioneve dhe grupeve teknike të të dyja shteteve. “Pikërisht për këtë arsye dua të takohem me të, si personi që merr vendimet”, shtoi ai. Kreu i shtetit ukrainas bëri të ditur se në qendër të një samiti të tillë duhet të vendoset arritja e një armëpushimi përgjatë frontit të luftës, si dhe ndërtimi i një sistemi efikas për monitorimin e çdo akordi. Po ashtu, ai theksoi se liderët duhet të trajtojnë çështjen e garancive të sigurisë për Ukrainën, planin e rimëkëmbjes ekonomike dhe fatin e rajoneve të okupuara. Në të njëjtën kohë, Zelensky refuzoi kategorikisht çdo mundësi të plotësimit të kushteve të Putinit lidhur me rajonin e Donbasit apo pranimin e Krimesë si pjesë e Rusisë, duke nënvizuar se veprime të tilla bien ndesh hapur me Kushtetutën e Ukrainës.