Statistikat alarmante: Mbi një mijë çifte i japin fund martesës brenda nëntë muajve

Shifra shqetësuese të ndarjeve regjistrohen në vend gjatë periudhës janar-shtator të këtij viti, ku zyrtarisht janë shënuar gjithsej 1 mijë e 74 raste të shkurorëzimeve. Sipas shifrave zyrtare të publikuara nga Agjencia e Statistikave të Kosovës (ASK), ecuria e ndarjeve ka shfaqur ndryshime konstante nga njëri muaj në tjetrin. Valën e parë të vitit e ka hapur muaji janar me 88 kurorëzime të anuluara, ndërkohë që në shkurt shifra ka pësuar rritje duke arritur në 135 raste. Statistikat vijojnë me muajin mars ku u regjistruan 111 vendime për ndarje, shifër e cila u përsërit edhe përgjatë muajit prill, kurse në maj u shënuan 117 raste të tilla. Gjatë muajit qershor, institucionet kompetente regjistruan 114 shkurorëzime të reja. Periudha e verës ka shënuar edhe pikun e këtyre statistikave, ku korriku rezulton të jetë muaji me numrin më të lartë të ndarjeve, gjithsej 168 raste. Më pas, gjatë muajit gusht treguesi ka rënë në 97, për t'u ngritur sërish në shtator me 133 raste të regjistruara. Në bazë të këtyre të dhënave statistikore, korriku mbajnë primatin për numrin më të lartë të çifteve që i kanë dhënë fund bashkëjetesës në këtë hark kohor nëntëmujor, ndërsa muaji i parë i vitit, janari, mbetet periudha me regjistrimet më të pakta të shkurorëzimeve.