Operacion dramatik në det: Mauritania shpëton 134 emigrantë që synonin Ishujt Kanarie

Forcat e Mbrojtjes Detare të Mauritanisë kanë ndërhyrë gjatë ditës së shtunë për t'i dhënë ndihmë urgjente një varke me 134 emigrantë në bord, të cilët kishin si destinacion Ishujt Kanarie, përmes njërës prej kalimeve detare më të rrezikshme për migracionin drejt Kontinentit të Vjetër. Sipas informacionit zyrtar të bërë publik nga ushtria mauritaneze, grupi i shpëtuar përbëhej nga 118 burra, 14 gra dhe dy të mitur, të cilët i përkisnin kombësive të ndryshme. Ndërhyrja u finalizua me sukses në korridorin detar afër qytetit portual të Nuadhibusë, në zonën veriore të shtetit afrikan. Deri në këto momente, autoritetet kompetente nuk kanë bërë publike hollësi lidhur me gjendjen shëndetësore të personave që ndrfodheshin në bordin e mjetit lundrues. Në njoftimin e shpërndarë për medie, institucioni ushtarak theksoi se ky aksion është pjesë e angazhimit të vazhdueshëm për mbrojtjen e jetëve njerëzore në ujërat territoriale, parandalimin e lëvizjeve të parregullta migratore dhe goditjen e strukturave kriminale të trafikimit të qenieve njerëzore. Për disa vite me radhë, një numër i madh emigrantësh nga rajoni i Afrikës, në veçanti të rinj, tentojnë të kapërcejnë Oqeanin Atlantik me varka të pasigurta dhe tejmbushura, me qëllim final mbërritjen në territorin evropian nëpërmjet arqipelagut spanjoll. Fluksi i nisjeve nga brigjet e Afrikës Perëndimore përfshin kryesisht shtetas nga Senegali, Gambia, Guinea dhe Mali. Gjatë periudhës së fundit, autoritetet kanë nxjerrë në siguri qindra individë në ujërat e Mauritanisë, ndërkohë që bilanci tragjik flet për mijëra të tjerë që kanë humbur jetën ose rezultojnë të zhdukur në përpjekjet e tyre dëshpëruese për të prekur tokën evropiane.