Zgjedhjet presidenciale në Bullgari: Iliana Iotova priret drejt fitores në balotazh

Procesi i votimit për raundin e dytë të zgjedhjeve presidenciale në Bullgari e gjen Iliana Iotovën në epërsi të qartë, ndërsa sondazhet e daljes nga kutitë e vendvotimeve i atribuojnë asaj 51% të konsensusit popullor gjatë së dielës. Në krahun tjetër, rivali i saj politik, ish-kryeministri i përkohshëm me orientim pro-perëndimor, Andrey Gyurov, pozicionohet në vendin e dytë me 44,7% të mbështetjes, referuar të dhënave të publikuara nga agjencia e studimit të opinionit publik Myara. Iotova, e cila më parë ka mbajtur postin e zëvendëspresidente, mori drejtimin e shtetit në mënyrë kalimtare gjatë muajit janar, pasi ish-kreu i shtetit Rumen Radev u tërhoq nga detyra për t'u përfshirë në garën e zgjedhjeve të parakohshme legjislative. E mbështetur nga formacioni politik i qendrës së majtë në pushtet, “Bullgaria Progresive”, Iotova gjatë periudhës së fushatës ka kërkuar në mënyrë të vazhdueshme një zgjidhje diplomatike dhe paqësore për konfliktin në Ukrainë, duke u angazhuar të pozicionohet si një “presidente e paqes” përmes tryezës së bisedimeve me Moskën. Nga ana e tij, Gyurov, i cili gzon mbështetjen e koalicionit opozitar liberal-konservator, gjatë fjalës së tij publike gjatë fushatës ka vënë theksin te domosdoshmëria e integrimit dhe bashkëpunimit më të ngushtë me aleatët perëndimorë, si dhe te nevoja për një ndihmë më të madhe ushtarake e politike për Ukrainën. E drejta për të votuar u takonte afërsisht 6,5 milionë qytetarëve bullgarë. Sipas të dhënave statistikore nga sondazhet, shkalla e pjesëmarrjes në zgjedhje shkoi në 29% në orët e pasdites, pak para mbylljes zyrtare të vendvotimeve në orën 20:00, duke shënuar një rritje krahasuar me pjesëmarrjen e regjistruar në raundin e parë një javë më parë.