Formë e shkëlqyer e shqiptarëve: Bislimi ndihmon Luganon drejt triumfit, Shaqiri me Baselin zhyten në krizë

Paraqitjet fantastike të futbollistëve shqiptarë në elitën e futbollit zviceran nuk kanë të ndalur, teksa Lugano ka shënuar suksesin e radhës duke mposhtur Baselin e Xherdan Shaqirit me shifrat 2:1. Ky rezultat e katapulton Luganon te fitorja e pestë rresht, ndërkohë që skuadra e Baselit vazhdon të vuajë në fushën e blertë, duke regjistruar sfidën e katër radhazi pa shijuar tri pikët. Përballja nisi vrullshëm dhe pas vetëm dhjetë minutash lojë, Lugano zhbllokoi shifrat falë një aksioni ku protagonist u bë Uran Bislimi. Mesfushori shqiptar lëshoi një pasim maestral me pjesën e jashtme të këmbës, duke çeduar prapavijën kundërshtare dhe duke gjetur Dos Santos në thellësi, i cili pavarësisht mundësisë për pasim, goditi nga një kënd tejet i mbyllur dhe mposhti portierin Omlin për 1:0. Formacioni fitues dyfishoi epërsinë në minutën e 27-të. Papadopoulos lëshoi një harkim diagonal nga e djathta për Cimignanin, i cili nuk u mendua dy herë dhe me një goditje të fuqishme nga distanca prej afro 18 metrash dërgoi sërish topin në rrjetë. Reagimi i Baselit erdhi në minutën e 37-të përmes një goditjeje këndi të harkuar nga kapiteni Xherdan Shaqiri. Pas devijimit me kokë të Michel, ishte Otele ai që përfitoj për të ngushtuar diferencën në 2:1 po ashtu me kokë. Sa i përket paraqitjes së personaliteteve në fushë, Xherdan Shaqiri dhe Uran Bislimi e nisën takimin nga minuta e parë. Bislimi u ndëshkua me karton të verdhë në minutën e 16-të, kurse kapiteni i Baselit u ndëshkua në fund të fraksionit të parë dhe u la i lirë nga trajneri për t'u larguar nga fusha në minutën e 65-të. Ndërkohë, sulmuesi tjetër shqiptar, Albian Ajeti, u hodh në fushë në minutën e 73-të në radhët e Luganos, duke dhënë kontributin e tij në mbajtjen e rezultatit deri në vërshëllimën e fundit. Sezoni aktual po dëshmohet mbresëlënës për Luganon, e cila mbetet e pamposhtur pas 12 ndeshjeve të luajtura, me 11 fitore dhe vetëm një barazim. Falë këtij ecurie prej kampioneje, Lugano udhëheq renditjen e kampionatit me 34 pikë, nëntë më shumë se ndjekësi më i afërt Young Boys, ndërsa Baseli ngel prapa në vendin e shtatë me vetëm 14 pikë të grumbulluara.