Tragjedia në Gjilan: Prangoset 65-vjeçari, dyshohet se qëlloi për vdekje djalin dhe foshnjën

Një ngjarje e rëndë ka tronditur qytetin e Gjilanit, ku pas vdekjes së dyshimtë të një 27-vjeçari dhe një foshnjeje tremuajshe, policia ka vënë në pranga babanë e viktimës. Zëdhënësi i Policisë për rajonin e Gjilanit, Ismet Hashani, ka konfirmuar se 65-vjeçari është arrestuar si i dyshuar kryesor dhe ndaj tij është caktuar masa e ndalimit prej 48 orësh. Sipas hetimeve preliminare në vendin e ngjarjes, incidenti tragjik ka ndodhur në kuadër të një konflikti familjar në fshatin Demiraj të Gjilanit. Aty janë gjetur pa shenja jete dy viktimat, të cilat u konstatuan si të vdekura nga ekipi mjekësor emergjent. “Me urgjencë në vendin e ngjarjes kanë dalë njësitet përkatëse policore, Prokurori i Shtetit dhe ekipi emergjent mjekësor, ku nga mjeku kujdestar është konstatuar se të dy personat janë pa shenja jete. Nga hetimet e para në vendin e ngjarjes, dyshohet se incidenti ka ndodhur brenda familjes, ku në cilësinë e personit të dyshuar është arrestuar babai i viktimës, i cili me vendim të prokurorit është ndaluar për 48 orë”, ka deklaruar Hashani. Autoritetet policore, në koordinim të ngushtë me Prokurorin e Shtetit, po zhvillojnë një sërë veprimesh operative dhe hetimore për të zbardhur plotësisht motivet dhe rrethanat e këtij rasti tragjik, i cili zyrtarisht është iniciuar si vepër penale e vrasjes së rëndë. Në ndërkohë, me urdhër të Prokurorit të Shtetit, trupat e pajetë të viktimave janë dërguar në Institutin e Mjekësisë Ligjore në Prishtinë për t'i nënshtruar obduksionit mjeko-ligjor.