Prani e rrezikshme e mykut në produktet e “Monuni”: AUV bllokon tregtimin dhe urdhëron tërheqjen e menjëhershme në Gjilan

Agjencia e Ushqimit dhe Veterinarisë (AUV) ka ndërmarrë masa urgjente ndaj kompanisë "MONUNI SH.P.K." nga Gjilani, pasi gjatë inspektimeve dhe kontrolleve kufitare është konstatuar prani e aflatoksinave që tejkalon normat e lejuara ligjore. Si rezultat, autoritetet kanë ndaluar shitjen e produkteve, kanë urdhëruar largimin e tyre nga tregu dhe kanë bllokuar importin. Sipas njoftimit zyrtar, gjatë verifikimit të një ngarkese prej 25,120 kilogramësh misër merkantil në pikën kufitare, rezultatet e analizave laboratorike të kryera nga AUV zbuluan praninë e aflatoksinës B1 në masën 30 µg/kg. Nga ana tjetër, analizat shtesë të realizuara nga Instituti Kombëtar i Shëndetësisë Publike të Kosovës (IKSHPK) konfirmuan praninë e aflatoksinave totale në vlerën 47 µg/kg, shifër kjo që është shumë herë më e lartë se kufiri referent i lejuar prej 10 µg/kg. Pas konstatimit të këtyre shkeljeve të sigurisë ushqimore, Inspektorati Fitosanitar pranë AUV-së ka marrë vendim zyrtar për të refuzuar importin e kësaj sasie dhe ka urdhëruar kthimin e menjëhershëm të të gjithë ngarkesës në shtetin e origjinës, me qëllim mbrojtjen e shëndetit të konsumatorëve.