Dokumenti zyrtar: Çfarë thotë Deklarata e Kuvendit të Kosovës kundër vendimit të Dhomave të Specializuara

Kuvendi i Kosovës pritet të votojë shumë shpejt Deklaratën zyrtare lidhur me aktgjykimin e Dhomave të Specializuara të Hagës ndaj ish-krerëve të Ushtrisë Çlirimtare të Kosovës, Hashim Thaçit, Kadri Veselit, Jakup Krasniqit dhe Rexhep Selimit. Kryetarja e Kuvendit, Albulena Haxhiu, ka nisur leximin e këtij dokumenti gjatë seancës plenare të thirrur për datën 28.09.2026, e cila mbështetet në nenin 65 të Kushtetutës së vendit dhe Rregulloren e punës së legjislativit. Në hyrje të deklaratës, institucioni më i lartë përfaqësues thekson se liria dhe pavarësia e Kosovës burojnë nga përpjekjet e gjata për dinjitet, si dhe nga rezistenca e armatosur e UÇKsë kundër represionit sistematik dhe krimeve gjenocidale të Serbisë, duke vlerësuar lart edhe ndërhyrjen shpëtimtare të aleatëve të NATO-s. Dokumenti vë në pah se asnjë vendim gjyqësor nuk mund t'i japë fund së vërtetës historike, duke kujtuar se Serbia kreu krime kundër njerëzimit, spastrim etnik dhe masakra gjatë luftës, ndërkohë që shpreh bindjen se kundërshtimi i një vendimi të padrejtë përmes rrugëve ligjore është pjesë e shtetit të së drejtës. Kuvendi i Kosovës përmes kësaj deklarate shpreh shqetësimin e thellë për vendimin e shkallës së parë ndaj katër ish-udhëheqësve, e quan plotësisht të papranueshëm konstatimin për ndërmarrje kriminale të përbashkët, dhe u bën thirrje institucioneve vendimmarrëse që të bashkërendojnë një strategji të përbashkët juridike e diplomatike për mbrojtjen e vlerave të luftës. Në fund, kujtohet se krimet e kryera në Kosovë gjatë periudhës 1998–1999 janë dokumentuar tashmë nga Tribunali Ndërkombëtar për ish-Jugosllavinë, i cili ka konfirmuar përgjegjësinë e shtetit serb dhe strukturave të tij për dëbimin dhe terrorin e ushtruar ndaj popullsisë shqiptare.