Skeptik për paqen në Ukrainë, Rubio mbron rrugën e komunikimit diplomatik me Moskën

Sekretari amerikan i Shtetit, Marco Rubio, ka vënë në pikëpyetje mundësinë e zgjidhjes së konfliktit në Ukrainë përmes rrugëve diplomatike. Gjatë qëndrimit në Atlanta, ku mori pjesë në takimin dyditor të ministrave të Jashtëm të G20-ës që përfundoi më 31 tetor, kryediplomati amerikan shprehu rezerva të theksuara mbi një marrëveshje të shpejtë paqeje. Sipas informacioneve nga zyrtarë evropianë, të cilët preferuan të mbeten anonimë, Rubio ka ndarë privatisht dyshime se një akord i qëndrueshëm mund të arrihet në muajt në vijim. Megjithëse në deklaratat publike ishte i matur, ai pranoi se Uashingtoni është ende në fazën e vlerësimit të terrenit. “Nuk jam i sigurt nëse paqja me negociata është e realizueshme për momentin, por jemi duke e shqyrtuar këtë mundësi. Askush këtu nuk pretendon se jemi në prag të një marrëveshjeje”, deklaroi Rubio para gazetarëve. Ndërkohë, ekipi i presidentit Donald Trump, ku bëjnë pjesë Jared Kushner dhe Steve Witkoff, po i kushton vëmendje të shtuar dosjeve të Ukrainës dhe Iranit. Rubio theksoi se, pavarësisht përpjekjeve, nuk ka ende një zhvillim konkret që do të sinjalizonte një dakordim të afërt, duke sqaruar se çështja e Ukrainës nuk ishte pjesë e diskutimeve zyrtare në Atlanta. Një tjetër temë e ndjeshme është pjesëmarrja e mundshme e Vladimir Putinit në samitin e dhjetorit në Majami, të organizuar nga presidenti Trump. Rubio bëri të ditur se ende nuk ka asnjë konfirmim për ardhjen e liderit rus. Burime diplomatike evropiane bëjnë të ditur se, në biseda private, sekretari amerikan ka shprehur skepticizëm mbi mundësinë që Putini t'i përgjigjet pozitivisht ftesës. Në mbrojtje të qasjes së administratës amerikane për të ftuar ministrin rus, Sergei Lavrov, në Atlanta dhe për t'i dërguar ftesë Putinit, Rubio argumentoi se dialogu është i pashmangshëm. “Si mund të negociohet paqe mes Rusisë dhe Ukrainës, nëse nuk komunikon me të dyja palët?”, pyeti ai, duke shtuar se biseda me një lider të huaj nuk nënkupton legjitimim të veprimeve të tij. Sekretari Rubio potencoi se ruajtja e kanaleve të komunikimit me Moskën është jetike, veçanërisht duke pasur parasysh arsenalin bërthamor rus dhe nevojën për të parandaluar përshkallëzimin e rrezikshëm të situatës. Sa i përket kontaktit të tij me Lavrovin në Atlanta, Rubio sqaroi se nuk pati një takim zyrtar, përveç një bisede të shkurtër mbi mundësinë e një takimi të liderëve në samitin e ardhshëm të APEC-ut, pa ndonjë zotim konkret.