Përplasje mes pushtetit dhe opozitës: Mungesa e programit qeverisës ndez debatet në Kuvend

Ekzekutivi i udhëhequr nga kryeministri Albin Kurti ende nuk ka zyrtarizuar programin qeverisës dhe planin e punës, ndonëse kalendari legjislativ tashmë ka marrë dritën jeshile. Kjo vonesë ka ngritur alarmin në kampin opozitar, ku vlerësohet se Qeveria po vepron pa një strategji të konsoliduar për zhvillimin e vendit. Nga ana tjetër, përfaqësuesit e shumicës parlamentare hedhin poshtë këto akuza, duke fajësuar bllokadën e kaluar institucionale për ngecjet, ndërsa kanë garantuar se dokumentet kryesore do të publikohen shumë shpejt. Deputeti i Aleancës, Burim Ramadani, ka shprehur skepticizëm tëthellë, duke theksuar se mungesa e një plani konkret operativ nuk përbën një dukuri të re për këtë përbërje qeverisëse. Sipas tij, praktika e marrjes së vendimeve ad-hoc, të udhëhequra nga kalkulimet partiake e jo nga vizioni shtetëror, ka dominuar edhe gjatë mandatit të shkuar. Ramadani ka vënë në shënjestër edhe mënyrën se si është hartuar agjenda legjislative, duke aluduar se nismat për ligje të reja nuk po burojnë nga vullneti i mirëfilltë politik i kabinetit qeveritar, por po prodhohen kryesisht nga aparati administrativ dhe ekspertët e fushës. Ramadani: Qeveria Kurti nuk ka plan pune dhe objektiva të qarta “Fatkeqësisht, ne kemi parë që ky strukturim i qeverisë ka kaluar edhe mandat të plotë pa plan pune. Edhe të gjitha vendimet i ka pasur ad-hoc, aty për aty, sipas interesave partiake dhe të qëllimeve partiake. E njëjta gjë, e njëjta histori është duke u përsëritur edhe tash. Kemi parë që nuk ka pas atij prezantimit fillestar, nuk ka plan pune, nuk ka qartësi, nuk ka objektiva të qarta dhe në të njëjtën kohë e ka një grumbullim idesh për ligje, të cilat kryesisht duket që kanë ardhë prej administratës dhe jo prej nivelit politik. Pra, nëse analizohet plani legjislativ, shihet qartë, sipas meje, që idetë kanë ardhë prej stafit profesional e administrativ, por jo si qëllime politike, objektiva politike të cilat duhet t'i ketë një qeveri. Pra, një qeveri duhet të vendosë qartë se si e sheh Kosovën pas katër vjetëve. Pra, pas mandatit të vet. Dhe në bazë të asaj, të vendosë se cilat janë objektivat dhe cilat janë ligjet edhe veprimet e vendimet që duhet të ndërmerren. Dhe kjo po mungon. Po mungon sepse kemi një klasë pushtetare të stërvjetëruar. Është politikë e vjetër kjo që po e bën zoti Kurti edhe qeveria. Është politikë e vjetër në mendësi, sepse nuk i përgjigjet asnjë lloj zhvillimi inovativ dhe të kërkesave, nevojave të rinisë së Kosovës”, deklaroi ai. Në krahun tjetër, shefja e Grupit Parlamentar të Lëvizjes Vetëvendosje, Arbërie Nagavci, ka mbrojtur qëndrimin e ekzekutivit, duke paralajmëruar se miratimi i programit qeverisës dhe planit të punës është çështje ditësh. Ajo ka sqaruar se frenimi i deritanishëm ka ardhur si pasojë e ngërçit institucional dhe kohës së paktë që ka kaluar që nga rifillimi i seancave plenare. Nagavci ka nënvizuar se Qeveria do të ndjekë zbatimin e premtimeve të dhëna më parë, ndërsa ka përkuar rëndësinë e miratimit të agjendës legjislative. Nagavci: Qeveria pritet të miratojë së shpejti programin qeverisës dhe planin e punës “Qeveria tashmë ka miratuar agjendën legjislative. Unë besoj se shumë shpejt do të kemi edhe programin qeverisës dhe planin e punës. Ju e dini se ne kemi bërë një gjë të tillë edhe në muajt e periudhës sa Kuvendi ishte jofunksional. E dini se është një kohë e shkurtër, dy javë që nga zgjedhja e presidentes dhe vazhdimi i punës së Kuvendit. Gjithë kjo ka ndodhur për shkak të ngërçit të krijuar nga opozita. Ne do të vazhdojmë me implementimin e planit i cili nuk ka ndryshime të mëdha nga ajo çka është thënë paraprakisht, pasi nuk ka ndryshuar.