Me kërkesën për dorëheqjen e kryeministrit Kurti, sot organizohet protestë masive në Prishtinë

Kryeqyteti i Kosovës pritet të jetë sot arena e një tubimi qytetar. Duke filluar nga ora 12:00, në Sheshin "Skënderbeu" në Prishtinë, është paralajmëruar mbajtja e një proteste të organizuar nga Durim Aliu, i cili u ka bërë thirrje qytetarëve për pjesëmarrje sa më të madhe. Përmes një postimi në rrjetin social Facebook, organizatori Aliu ka sqaruar se ky mobilizim nuk bëhet për interesa të caktuara partiake, por zhvillohet në të mirë të qytetarëve, familjeve dhe të ardhmes së Kosovës. Kërkesa qendrore e protestuesve është dorëheqja e menjëhershme e kryeministrit Albin Kurti, duke refuzuar opsionin e ndryshimeve të thjeshta në kabinetin qeveritar apo zëvendësimin e ministrave. Në thirrjen e tij drejtuar opinionit publik, Aliu kishte shkruar: “Albin Kurti, ditët e llogaridhënies kanë ardhur! Nesër nuk dalim për parti, por për qytetarët, për familjet tona dhe për të ardhmen e Kosovës. Nuk kërkojmë ndërrim ministrash. Kërkojmë dorëheqjen e Albin Kurtit!”. Organizatori i ka bërë thirrje sërish popullit që t'i bashkohet këtij tubimi sot në mesditë në zemër të kryeqytetit, duke e përmbyllur mesazhin e tij me sloganin: “Republika është e qytetarëve!”.