Tragjedi në Selanik: 80-vjeçarja humb jetën në banesë, vihet në pranga bashkëshorti 90-vjeçar

Një ngjarje tronditëse ka tronditur zonën e Chalastra-s në Selanik të Greqisë, ku një grua 80-vjeçare është zbuluar e pajetë brenda shtëpisë së saj. Autoritetet policore kanë ndërhyrë duke arrestuar bashkëshortin e viktimës, një 90-vjeçar, ndërkohë që hetimet janë përqendruar në zbardhjen e rrethanave ende misterioze të kësaj ngjarjeje. Zbulimi makabër është bërë të shtunën nga vajza e çiftit të moshuar, e cila ka alarmuar menjëherë autoritetet kompetente. Forcat e rendit që mbërritën në vendngjarje konstatuan se viktima paraqiste shenja dhune dhe dëmtime në kokë. Në të njëjtën banesë ndodhej edhe 90-vjeçari, i cili gjithashtu mbante plagë trupore në kokë dhe në duar. Për shkak se i moshuari vuan nga demenca, ai ka qenë i paaftë t'u ofrojë hetuesve një dëshmi të konsistueshme apo të shpjegojë dinamikën e tragjedisë, qoftë për fatin e bashkëshortes, qoftë për plagët e marra vetë. Pas ndërhyrjes së autoriteteve, ai është dërguar urgjentisht në spitalin “Papageorgiou”, ku po mbahet nën kujdesin mjekësor dhen mbikëqyrjen e rreptë të policisë. Masat e arrestit janë ndërmarrë me urdhër të drejtpërdrejtë të prokurorit përgjegjës, ndërsa puna hetimore vazhdon intenzivisht. Grupi hetimor po vijon mbledhjen e provave materiale në skenën e krimit dhe nuk po anashkalon as pistën e përfshirjes së ndonjë personi të tretë në banesë. Deri në këto momente, shkaqet dhe dinamika e plotë e vdekjes së 80-vjeçares mbeten plotësisht të paqarta.