Moti me të papritura këtë të diel: Nga vranësirat e dendura te reshjet e shiut dhe dëborës në lartësi

Kjo e diel do të karakterizohet nga një mot me stabilitet të ulët atmosferik në të gjithë territorin e vendit. Shërbimet meteorologjike parashikojnë dominim të vranësirave mesatare deri në të dendura, me momente të caktuara ku do të ketë edhe çaste të shkurtra me kthjellime dhe rreze dielli. Që në orët e para të ditës, pjesa më e madhe e rajonit do të përfshihet nga reshje shiu me intensitet të ulët, të cilat do të vijojnë me ndërprerje gjatë gjithë 24-orëshit. Në zona të caktuara, këto reshje mund të marrin trajtën e shtrëngatave me kohëzgjatje të shkurtër, të shoqëruara edhe me shkarkesa elektrike. Për sa u përket zonave malore me lartësi mbi 1100-1200 metra mbi nivelin e detit, kryesisht në verilindje, veri, lindje dhe juglindje të vendit, priten reshje me trajtë bore me intensitet të ulët. Sa i përket parametrit të erës, ajo do të fryjë nga drejtimi verilindje-juglindje me një shpejtësi mesatare prej 4 m/s. Sidoqoftë, përgjatë bregdetit dhe në zonat luginore, hera-herës shpejtësia do të arrijë deri në 12 m/s, duke krijuar një valëzim të lehtë në dete të forcës 1 deri në 2 ballë.